Brıtanııa Grekııaǵa kómek kórsetpeıdi
ASTANA. QazAqparat - Grekııaǵa kómekke aqsha bólý máselesi brıtandyq salyq tóleýshilerdiń qatysýynsyz sheshilýi múmkin, dep málimdedi premer-mınıstr DevıdaKemeronnyń resmı ókili Eýropalyq qarjylyq turaqtylyq tetiginen qarjy bólý týraly EO kóshbasshylarynyń usynysy týraly sózinde.
Afınynyń qarjyǵa suranysy jeti mıllıard eýro. EO kóshbasshylary Grekııaǵa Eýropalyq qarjylyq turaqtylyq tetiginiń qarajatyn paıdalanyp, brıdj-kredıt berýdi teris kórmeıdi. EFSM-ge EO-nyń barlyq memleketi, onyń ishinde eýroaımaqqa kirmeıtin Ulybrıtanııa da qatysady.
«Bizdiń ustanym árdaıym naqty - brıtandyq salyq tóleýshilerdiń aqshasy Grekııa boıynsha eýroaımaqtyń ýaǵdalastyǵyn qarjylandyrýǵa paıdalanylmaýy tıis. Sondyqtan da bul múmkin emes», - degen Kemeron ókiliniń sózin keltirdi Reıter agenttigi.
«Pikirtalas búgin ótýde. Birqatar eldiń bildirgen oıy alańdaýshylyq týǵyzýda. Keıbir máseleler ońynan sheshiledi dep oılaımyn», - dedi ol.
Keshe Brıtanııa qarjy mınıstri Djordj Osborn brıtandyqtardyń Grekııaǵa kómekke qatysý ıdeıasyn múmkin emes dep málimdedi.
