Brıtanııa fýnty edáýir arzandady
BRıÝSSELЬ. QazAqparat – Brıtanııalyq fýnt Brexit «qatańdyǵy» saldarynan sońǵy úsh jylda eń nashar kórsetkishter kórsetip keledi, dep habarlaıdy QazAqparattyń menshikti tilshisi Bloomberg agenttigine silteme jasap.
Sońǵy tórt kúnde fýnt 3%-ǵa tómendedi, sebebi ınvestorlar Ulybrıtanııanyń 31 qazanda kelisimsiz Eýropalyq odaqtan shyǵatynyna alańdaýly.
London men Brıýssel arasyndaǵy kelispeýshilik artyp jatqandyqtan, premer-mınıstr Borıs Djonson Eýroodaqpen tıimdi kelisim jasaýǵa umtylýda. Sondaı-aq, EO bas tartqan jaǵdaıda, eldi odan shyǵarýǵa da daıyndap jatyr.
Seısenbi kúni sterlıng 0,8%-ke, 1,2119 dollarǵa deıin qulap, eýroǵa shaqqanda 0,5% - 91,64 penske tómendedi.
Sońǵy ret fýnt 2016 jyldyń qazanynda tórt kún qatarynan qulap, valıýta baǵamy 6% - 1,1841 dollarǵa arzandaǵan edi. Bul jaǵdaı burynǵy premer-mınıstr Tereza Meı Ulybrıtanııanyń EO-dan shyǵatynyn resmı túrde málimdegen kezde boldy.
