Brıtanııa bıligi myńdaǵan aýǵandyqty qupııa túrde óz eline kóshirdi

ASTANA. KAZINFORM – Birikken Koroldikke úkimettiń qupııa júıesi aıasynda myńdaǵan aýǵan azamaty jetkizilgen. Bul týraly osy másele boıynsha kez kelgen aqparatty jarııalaýǵa tyıym salatyn sot ókimi 15 shilde kúni kúshin joıǵan soń Financial Times (FT) basylymy jazdy, dep habarlaıdy reseılik TASS.

Belgili bolǵanyndaı, endi ǵana jarııalanǵan qujattardyń ishinde talıbter bılik basyna kelgen 2021 jyldyń tamyzyna deıin Londonmen tyǵyz qarym-qatynasta jumys istegen 25 myń aýǵandyqtyń jeke málimetteri 2022 jyldyń aqpanynda ınternetke tarap ketken.

Aqparatty Brıtanııa qorǵanys mınıstrliginiń qyzmetkeri ádeıi taratqan. Qaýipti jaǵdaıda qalǵan adamdar sany otbasy múshelerin qosa alǵanda, 100 myń adamǵa jýyqtaýy yqtımal, dep jazady basylym.

Ulybrıtanııa bıligi aqparattyń taraǵanyn 2023 jyldyń tamyzynda ǵana bilgen jáne olar birden osy adamdardy koroldikke kóshirý baǵdarlamasyn iske qosqan.

Financial Times-tiń habarlaýynsha, Brıtanııa bıiligi osy ýaqytta jarııalanyp ketken qujatta aty atalǵan 18,5 myń aýǵandyqty kóshirip úlgergen. Bul tizimge qoldanystaǵy tetik boıynsha kóshýge ruqsaty bar adamdar da kirdi. Aqparattyń taraýyna tikeleı baılanysty 5,5 myń adam kóshirilgen, taǵy 2,4 myń adam kóshiriletin bolady.

Ulybrıtanııanyń qorǵanys mınıstri Djon Hılı Qaýymdar palatasynda sóılegen sózinde vedomstvo tarapynan jiberilgen osy qatelik úshin keshirim surady.

Sondaı-aq qatelikpen esimderi jarııalanyp ketken myńdaǵan aýǵandyq Brıtanııa úkimetin sotqa beretinin málimdedi.

The Daily Telegraph basylymynyń jazýynsha, aýǵandyqtardy shuǵyl kóshirýge jumsalatyn shyǵyn bıýdjettegi mıllıardtaǵan shyǵyndy qyqartýǵa umtylyp otyrǵan Ulybrıtanııa qarjy mınıstri Reıchel Rıvske qosymsha problema týdyrady. Basylymnyń jazýynsha, endi olarǵa salyq mólsherin kóterýden basqa amal joq.

Osyǵan deıin Ulybrıtanııanyń 14 jyldan keıin Sırııamen dıplomatııalyq qatynastardy qaıta ornatqany týraly jazdyq.