Brıtandyq jýrnalıst qazaqstandyq týrızmdi nasıhattaýǵa «EkspoStan» brendin usyndy
ASTANA. QazAqparat - Astanadaǵy Travel Media Talks forýmynda Halyqaralyq jýrnalıst, Ulybrıtanııadaǵy tanymal prodıýser Rız Han Qazaqstan týrızmin keńinen nasıhattaý joldaryn atady, dep habarlaıdy QazAqparat.
Rız Han uzaq ýaqyt boıy «stan» brendi batysta teris qabyldanyp kelgenin aıta kele: «Brendıngpen aınalysatyn negizgi menedjerlermen pikir almasqan kezde, buryndary bul jaǵdaı problema ekenin jıi estıtinmin, ıaǵnı adamdar Qazaqstandy tıisti «stan» jalǵaýymen baılanystyryp qabyldaıtyn. Alaıda ony alyp tastaýdyń reti joq, bul jaǵdaıdy baqylaýǵa alý kerek. Atap aıtqanda, «stan» jalǵaýyn barlyq sózderge qosyp, osy brendtiń ıesi ekenderińizdi jarııalaý qajet. Jastarǵa bul bastama qyzyqty bolady. Brendıng ózge elderdiń adamdarynyń kózqarasyna eleýli túrde yqpal etedi. Osyndaı qadamdar negizinde kóptegen elder ózderine qatysty qarym-qatynasty ózgertti», - dedi.
Budan bólek sarapshy týrızmdi nasıhattaýda keıbir elderdegi urandardyń yqpaly týraly pikir bildirdi.
«Kóp elderde túsiniksizdeý urandar paıdalanyldy, ıaǵnı olardyń maǵynasyn túsiný qıynǵa túsedi. Al 90-jyldary Malaızııa óziniń «Malazııa - naǵyz Azııa» uranynyń arqasynda týrıster aǵynyn eki esege arttyrdy. Eger de sizder «stan» ımıdjimen brendti baqylaýǵa alsańyzdar, bul mádenıet sizderge qatysty ekenin jáne qadaǵalaýda ustap turǵandyqtaryńyzdy kórsetesizder. «EkspoStan», «Toı-tomalaqStan» tıimdi heshteg bola alar edi, sondaı-aq ony jastar arasynda keńinen ilgeriletý múmkindigi bar. Álem qatty ózgerdi, qazirgi kezde jarnamaǵa burynǵydaı qomaqty qarjy jumsamaıdy. Búginde áleýmettik jeliler adamdardyń kózqarasyna qatty áser etedi. Sondyqtan «stan» brendin zertteńizder. Osy ǵajaıyp elge týrısterdi tartýǵa qaýqarly jas elshiler kerek», - dedi brıtandyq jýrnalıst.
