Brıtandyq jazýshy Qazaqstan táýelsizdiginiń 25 jyldyǵy medalimen marapattaldy
ASTANA. QazAqparat - Qazaqstannyń Ulybrıtanııadaǵy Elshisi Erlan Ydyrysov belgili brıtandyq jazýshy jáne Ulybrıtanııanyń memlekettik qaıratkeri Djonatan Aıtkenge «Qazaqstan Respýblıkasy táýelsizdigine 25 jyl» medalin tabystady.
Elshiliktiń baspasóz qyzmetiniń habarlaýynsha, medaldi tabystaı otyryp, Elshi E. Ydyrysov bul marapattyń Dj.Aıtkenniń Qazaqstannyń barsha álemge tanymaldylyǵynyń artýyna jáne onyń halyqaralyq ımıdjiniń ilgerileýine qosqan úlesiniń belgisi ekendigin atap ótti. Ol brıtandyq jazýshynyń «Nazarbaev jáne Qazaqstannyń jasampazdyǵy» jáne «Qazaqstan: táýelsiz 20 jyldan keıingi tańǵajaıyptar men stereotıpter» kitaptarynyń barsha álemge jańa Qazaqstandy jáne Memleket basshysynyń elimizdiń qalyptasýynda jáne damýynda atqarǵan kórnekti rólin kórsetetin mańyzdy derekkózderdiń biri ekendigine toqtaldy.
Sonymen birge, Qazaqstan Elshisi Dj. Aıtken eńbekteriniń halyqaralyq sarapshylar qaýymdastyǵynyń Qazaqstannyń táýelsizdik alǵan 25 jyl ishinde qol jetkizgen jetistikterine bergen joǵary baǵasynyń kórinisi ekendigin de basyp aıtty.
Dj. Aıtken óz kezeginde joǵary marapat úshin óz alǵysyn bildirip, QR Prezıdenti N.Á. Nazarbaevtyń ómirbaıanyn jazǵan alǵashqy batys jazýshysy ekendigin maqtan tutatyndyǵyn atap ótti. Onyń aıtýynsha táýelsiz Qazaqstannyń jáne onyń kóshbasshysynyń aıtarlyqtaı eleýli jetistikterin, sondaı-aq elimizdiń halyqaralyq bastamalaryn álemdik qaýymdastyqqa aıtyp jetkizý ol úshin úlken mártebe.
Brıtandyq jazýshy Qazaqstannyń 25 jyl ishinde aımaqtaǵy ózindik ekonomıkalyq lokomotıvke jáne álemdegi eń jyldam damyp kele jatqan memleketterdiń birine aınalǵandyǵyn, al Elbasy N.Á. Nazarbaevtyń basshylyǵymen júrgizilip jatqan ekonomıkalyq jáne saıası reformalardyń eldiń odan ári damýyndaǵy mańyzdy qadam ekendigine basa nazar aýdardy.
Eske sala ketsek, Djonatan Aıtken - brıtandyq jazýshy, brıtan Parlamenti jáne Úkimetiniń burynǵy múshesi. Ol AQSh eks-Prezıdenti R. Nıksonnyń jáne Ulybrıtanııa burynǵy Premer-Mınıstri M. Tetcherdiń ómirbaıandarynyń avtory. 2009 jyly Dj. Aıtkenniń QR Prezıdenti N.Á. Nazarbaev týraly «Nazarbayev and the Making of Kazakhstan», al 2011 jyly «Kazakhstan and Twenty Years of Independence» atty kitaptary jaryq kórdi.
