Brıtandyq tanymal jýrnal Qazaqstan týraly maqala jarııalady

ASTANA. QazAqparat - Condé Nast Traveller tanymal halyqaralyq basylymy The most Breathtaking Places to Visit in Kazakhstan («Qazaqstanda barýǵa bolatyn eń qyzyqty oryndar») atty materıal jarııalady, dep habarlaıdy QazAqparat.

Maqalanyń taqyryby aıtyp turǵandaı, avtorlar Almaty, Býrabaı, Astana, Mańǵystaý, Túrkistan, Shyǵys Qazaqstan jáne Ulytaýdyń ásem tabıǵatyn egjeı-tegjeıli kórkem sıpattaıdy. Bul rette, Qazaqstan álemdegi baǵalanbaǵan týrıstik baǵyttardyń biri, dep atap kórsetedi.

Sondaı-aq, avtorlar Qazaqstandy aýqymy jaǵynan ǵalamshardaǵy asqar taýlardan tuzdy bastaýlarǵa deıin, móldir kólderden ný ormandarǵa deıin, zamanaýı sáýletten ejelgi tóbelerge deıingi tańǵajaıyp peızajy bar toǵyzynshy el retinde baǵa bergen.

«Ótken bir aptada ǵana Qazaqstan Úndistannan kelgen týrıster úshin eń úzdik trend baǵyty retinde tanyldy. Buǵan deıin Qazaqstan tanymal curly tales saıtynyń nusqasy boıynsha qoljetimdi demalys boıynsha TOP-10 eldiń qataryna kirdi. Álemdik basylymdar Qazaqstanǵa barǵan saıyn nazar aýdaryp, týrısterdiń Qazaqstanǵa kelýine usynys jasaıtyny qýantady. Biz otandyq jáne sheteldik týrısterdiń jaıly demalysy úshin jaǵdaı jasap, osy baǵyttaǵy jumysty jalǵastyramyz», - dep atap ótti vıtse-mınıstr Erjan Erkinbaev.

Foto: www.cntraveller.com