Brıtandyq sýpermarketter krannyń sýyn satqany úshin aıyptalýda
ASTANA. 20 tamyz. QazAqparat - Brıtandyq Tesco jáne Asda sýpermarketter jelisi kádimgi krannyń sýyn bótelkelerge quıyp, sata beredi, dep málimdedi The Daily Mail. Basylymnyń atap ótýinshe, rıteılerler mundaı sýdy satýdan 2500 paıyzdyq paıda kóredi.
Saýda oryndary úshin arnaıy daıyndalatyn aýyz sýynyń 1 lıtri 17 pens (40 teńge) turady. Salystyra ketsek, belgili Evian frantsýzdyq brendiniń 2 lıtrlik mıneraldy sýy 88 pens (205 teńge) bolady. Gazettiń jazýynsha, sýpermarketter kádimgi krannyń sýyn fıltrden ótkizip, sata beredi eken.
Degenmen, saýda jelileriniń ókilderi ózderiniń kran sýyn satatyndaryn moıyndaǵan. Alaıda olar ony arnaıy fıltrden ótkizip, hlor men basqa da qospalardan aryltatyndyqtan, ózderiniń satatyn sýyn áste krannyń sýy dep ataýǵa bolmaıtynyn málimdedi.
Osyǵan baılanysty týyndaǵan janjalda eldi aýyz sýmen qamtamasyz etýge jaýapty brıtandyq Water UK kompanııasy kran sýynyń taza ekendigi sonshalyq, tipti ony eshqandaı fıltrden ótkizbeı-aq paıdalana berýge bolatynyn aıtyp, saýda jelilerine renishin bildirgen. Kompaııanyń málimetinshe, tekseriske jiberilgen sý úlgileriniń 99,96 paıyzy densaýlyqqa esh zııan keltirmeıtindigi dáleldengen.
Tesco Ulybrıtanııadaǵy bólshek saýdanyń eń úlken júıesi, al álemdik naryqta ol úzdik tórttiktiń qataryna enedi. Asda bolsa, amerıkalyq Wal-Mart saıda jelisiniń enshiles kompanııasy, ol brıtan naryǵynda ekinshi orynǵa shyqqan.
