Brıtandyq sáýletshi N.Fosterge Londonda QR Prezıdentiniń beıbitshilik jáne progress Memlekettik syılyǵy tabys etildi

ASTANA. QazAqparat - Qazaqstannyń Ulybrıtanııadaǵy Elshisi Erjan Qazyhanov belgili brıtandyq sáýletshi Norman Fosterge Qazaqstan Respýblıkasynyń Tuńǵysh Prezıdenti - Ult Kóshbasshysy Nursultan Nazarbaevtyń beıbitshilik jáne progress Memlekettik syılyǵyn tabystady. Bul týraly elshiliktiń baspasóz qyzmeti habarlady.

Syılyqty tabystaı otyryp, Elshi E. Qazyhanov bul marapattyń N. Fosterdiń Astana qalasynyń arhıtektýralyq óneriniń damýyna qosqan erekshe úlesiniń belgisi ekendigin atap ótti. Onyń sózinshe, brıtandyq sáýletshiniń jobasy boıynsha turǵyzylǵan ǵımarattar men qurylys nysandary Astanaǵa erekshe sán berip, Elordany álemniń aıtýly bas qalalarynyń birine aınaldyryp otyr.

Kezdesý barysynda Elshi sondaı-aq Astananyń jyldam qarqynmen damyp kele jatqandyǵyna jáne Qazaqstan elordasynyń az ýaqyt ishinde 2010 jyly ótken EQYU sammıti men 2011 jylǵy VII qysqy Azııa oıyndary sııaqty asa iri halyqaralyq saıası jáne mádenı is-sharalar ótken orynǵa aınalǵandyǵyna da basa nazar aýdardy.

Sonymen birge, 2017 jyly Astanada «EKSPO» halyqaralyq mamandandyrylǵan kórmesin ótkizý jáne Eýrazııa aımaǵyndaǵy asa iri qarjy habyna aınalýdy kózdep otyrǵan «Astana» halyqaralyq qarjy ortalyǵynyń ashylýy da josparlanyp otyrǵandyǵy jóninde aıtyldy.

Óz kezeginde, N. Foster Elbasynyń memlekettik syılyǵy úshin óz alǵysyn bildirip, Qazaqstannyń jańa elordasyn turǵyzý sııaqty úlken jobaǵa qatysýshylardyń biri bolǵanyn maqtan tutatyndyǵyn atap ótti. Onyń oıynsha, Astana álemdegi jetekshi ortalyqtardyń biri bolýǵa zor múmkindigi bar. «Bolashaq energııa» taqyrybynda ótetin «EKSPO» kórmesi memleket úshin de, halyqaralyq qaýymdastyq úshin jahandyq mańyzǵa ıe.

Aıtýly syıaqy rak aýrýymen kúresýdi kózdeıtin N. Foster atyndaǵy qaıyrymdylyq qoryna jáne osy baǵytta medıtsınalyq zertteý júrgizip jatqan uıymǵa aýdarylyp, aýrýdyń paıda bolý sebepterin zertteýdi qarjylandyrýǵa jáne ony emdeýdiń aldyńǵy qatarly ádisterin oılap tabýǵa jumsalatyn bolady.

Qazaqstan Respýblıkasynyń Tuńǵysh Prezıdenti - Ult Kóshbasshysy N.Á. Nazarbaevtyń beıbitshilik jáne progress Memlekettik syılyǵy N. Fosterge onyń sáýlet óneriniń damýyna, halyqtar arasyndaǵy beıbitshilik pen dostyqty jáne ózara senimdilikti nyǵaıtýǵa qosqan aıryqsha úlesi úshin berilip otyr.

Norman Foster - brıtandyq sáýletshi, Imperator jáne Prıttsker syılyqtarynyń ıegeri. Ol Astana qalasyndaǵy «Beıbitshilik jáne kelisim saraıy» (2006 j.), «Han-Shatyr» saýda-oıyn saýyq ortalyǵy (2010 j.) jáne QR Tuńǵysh Prezıdenti kitaphanasy ǵımarattarynyń avtory.