Brıtandyq otbasy 36 jyl boıy kóne qumyrany esikke tireýish retinde paıdalanyp kelgen
ASTANA. QazAqparat - 36 jyl boıy bırmıngemdik januıa esikke tireýish retinde paıdalanylyp kelgen 300 jyldyq tarıhy bar eski qumyra aýktsıonda 650 myń fýnt sterlıngke satyldy, dep habarlaıdy jergilikti BAQ.
Olardyń úıine aýktsıon úıiniń qyzmetkeri kezdeısoq kelmegende, jádigerdi qandaı taǵdyr kútip turǵany beımálim edi. Tájirıbeli maman qumyra qunynyń joǵary ekenin aıtyp, qojaıyndarǵa ony bássaýdaǵa shyǵarýdy usynady.
- Qumyra bul úıde 1980 jyldan beri bar, qojaıyndary onyń qundy jádiger ekenin bilmegen. Tek qumyranyń 1930 jyldary antıkvarıat alyp satýmen aınalysqan týysy - Flo apaıynan muraǵa qalǵanyn biledi, - dedi baǵalaýshy Adrıan Retboýn.
Qumyranyń jańa ıesi qytaılyq kollektsıoner bolashaqta qumyrany kem degende mıllıon fýntqa satýdy josparlap otyr.
