Brıtandyq mýzeı Ózbekstanda urlanǵan jádigerdiń qaıtarylýyna kómektesti
ASTANA. QazAqparat - Brıtandyq mýzeı Ózbekstannyń Buhara oblysy Vabkent aýdanynda ornalasqan ortaǵasyrlyq Chashmaı-Aıýb kesenesiniń aldyńǵy betindegi urlanǵan taqtasyn Ózbekstanǵa qaıtarýǵa kómektesti. Bul jaıly The Guardian basylymy jazdy.
Bıiktigi jarty metr arabsha kallıgrafııalyq jazbasy bar kógildir tústi plıtka 2014 jyly joǵalyp ketken. Buharadan on shaqyrym qashyqtyqta ornalasqan HІІ ǵasyr kesenesiniń joǵarǵy jaǵynda taqta orny sodan beri úńireıip tur.
Qabyrǵa bólshegin londondyq Mayfair galereıasynda satylymǵa qoıylǵanǵa deıin mundaǵy jurt endi qaıtyp tabylmaıdy dep eseptep keldi. Taıaýda ǵana Ózbekstanǵa kelgen oksfordtyq ǵalym atalmysh plıtkanyń sýretin Saımon Reı galereıasynyń katalogynan baıqap qalǵan. Qabyrǵa bólshegin satyp alǵan Reı birden Brıtandyq mýzeıge habarlasqan, olar kollektsııa jınaýshynyń bul áreketine rızashylyǵyn bildirdi.
Reıdiń aıtýynsha, satýshylar plıtkanyń kóp jyldar boıy Germanııadaǵy kollektsııalardyń qatarynda saqtalyp kelgenine sendirgen. Mýzeıdiń aǵa kýratory Sent-Djon Sımpson tarıhı kesenedegi plıtkanyń urlanýyn qylmysqa balap, ony Vestmınster abbatyndaǵy memorıaldyq taqtanyń urlanýymen salystyrdy.
«Bul eń keremet, iri jáne eń kóne jazbalary bar Ortalyq Azııanyń dinı eskertkishteriniń biri», - dedi mýzeı ókili.
The Guardian basylymy Ózbekstannyń premer-mınıstri Abdýlla Arıpov tarıhı eskertkishtiń otanyna qaıtarylǵandyǵyna baılanysty Brıtandyq mýzeıge sheksiz alǵysyn bildirgendigin jazdy. Kesene qabyrǵasynyń bólshegi qalaı urlanǵandyǵy jáne Ózbekstannan Eýropaǵa qalaı shyǵarylǵandyǵy ázirge belgisiz. 
Foto: British Museum
