Brıtandyq koronavırýs shtamy Qazaqstanda tirkelgen joq – Bas sanıtarlyq dáriger

NUR-SULTAN. QazAqparat – QR Densaýlyq saqtaý vıtse-mınıstri – Bas memlekettik sanıtar dáriger Erlan Qııasov Ortalyq kommýnıkatsııalar qyzmetinde ótken brıfıngte eldegi epıdemıologııalyq jaǵdaıdy baıandady, dep habarlaıdy QazAqparat tilshisi.

«Mýtatsııa – vırýstar evolıýtsııasynyń tabıǵı bóligi bolyp sanalady. Qyrkúıek aıynda Anglııanyń ońtústik-shyǵysynda genetıkalyq joldaǵy kóptegen ózgeristerden turatyn vırýstyq genomdyq júıeleýden koronavırýstyń jańa shtamynyń alǵashqy jaǵdaıy tirkeldi. Búgingi tańda vırýstyń bul túri Aýstralııa, Danııa, Italııa, Islandııa, Nıderlandy, Reseı jáne basqa da birneshe elderden tabyldy» - dedi Erlan Qııasov OKQ-da ótken onlaın-brıfıngte.

Aldyn ala málimetter boıynsha, vırýstyń basqa nusqalaryna qaraǵanda, bul vırýs halyqtyń jas toptary arasynda belsendi taralady.

«Biraq munyń barlyǵy aldyn ala zertteýler, bul qubylysty zertteý áli de jalǵasýda. Qazaqstanda vırýstyń bul túri anyqtalǵan joq. Vırýstyń aýa-tamshy arqyly berilý mehanızmin eskere otyryp, ony elimizge ákelý qaýpin de joqqa shyǵarýǵa bolmaıdy», - dep atap ótti Qazaqstannyń bas sanıtarlyq dárigeri.