Brıtandyq kınokompanııa Qazaqstandaǵy ıadrolyq synaqtar týraly derekti fılm túsirdi
«Fılmdi brıtandyq rejısser jáne derekti fılm túsirýshi Andre Sınger túsirdi. Kartına meniń sýret salýymnan bastalady, al fınalda men óz jumysymdy aıaqtaımyn. Taspa 2016 jyly eki kezeńde – qysta jáne jazda túsirildi. Onda bizdiń Semeı polıgonynda ǵana emes, basqa elderde de ıadrolyq synaqtarǵa qarsy kúres júrgizgen adamdar týraly aıtylady. Bıyl Semeı polıgonyn jabý týraly Jarlyqtyń shyqqanyna 30 jyl tolady. Men ıadrolyq qarýdan bas tartqan elde turatynymdy maqtan tutamyn», – deıdi «Atom» jahandyq jobasynyń qurmetti elshisi Káripbek Kúıikov.
Sýretshiniń aıtýynsha, antııadrolyq qozǵalysqa alǵashqylardyń biri bolyp qaraǵandylyq kenshiler qosylǵan. Olar Sovetskıı dańǵylyna, qazirgi Buqar jyraý dańǵylyna mıtıngige shyqqan jáne olardyń talaptarynyń qatarynda Semeı polıgonyn jabý boldy.
«Fılmde men ǵana emes, Nevada-Semeı antııadrolyq qozǵalysynyń Qaraǵandy bólimshesiniń tóraǵasy Marǵulan Hamıev, sondaı-aq jerles – jazýshy Mıhaıl Brodskıı týraly baıandalady. Kınokartınada polıgondaǵy jarylystan múgedek bolǵan Semeı turǵyny Berik Syzdyqovtyń ómiri týraly da aıtylady. Onyń qasy men qabaqtyń aınalasyndaǵy terisi ósip, zaǵıp bolyp qalǵan», – dedi Káripbek Kúıikov.
Sondaı-aq «Saryjaılaý» kınoteatrynda Káripbek Kúıikovtiń sýretteriniń kórmesi ótti.
«Ekspozıtsııada meniń jumystarymnyń az bóligi usynylǵan, qazir kóptegen kartınalar Jezqazǵanda ornalasqan. Shyǵarmashylyqtyń negizgi baǵyty – peızajdarda, meniń shyǵarmalarymda ıadrolyq taqyryp árqashan bolady. Sebebi olar adamdarǵa ıadrolyq synaqtar týraly únemi eske salady», – deıdi sýretshi.
Derekti fılm Almaty men Nur-Sultanda da kórsetildi.
Eske sala keteıik, Semeı ıadrolyq polıgonynda 600-den astam ıadrolyq jáne termoıadrolyq bombalardyń 500-ge jýyq jarylysy jasalǵan bolatyn. Polıgon 1991 jyly jabyldy.
