Brıtandyq kınoakademııa 2013 jyldyń úzdik fılmin atady
ASTANA. 10 qańtar. QazAqparat - Alfonso Kýaronnyń «Tartylys kúshi» («Gravıtatsııa») fılmi Brıtan kıno jáne televızııa óneri akademııasynyń (BAFTA) atalymdary boıynsha 2013 jyldyń úzdik fılmi bolyp tanyldy. Syılyqtyń resmı saıtynda keshe habarlanǵandaı, bul fılm «Úzdik fılm», «Brıtandyq keremet fılm», «Úzdik rejısser» jáne «Úzdik stsenarıı» atalymdaryna da úmitker bolyp otyr.
«Tartylys kúshinde» basty róldi somdaǵan Sandra Býllok «Úzdik aktrısa» atalymy boıynsha úmitkerler tizimine ilikti. Onyń básekelesteri retinde Emı Adams («Amerıkalyq afera»), Keıt Blanshett («Jasmın»), Emma Tompson («Mıster Benksti qutqarý») jáne Djýdı Dench («Fılomena») sııaqty aktrısalar tańdaldy.
Aldyńǵy plandaǵy úzdik akter ataǵy Martın Skorsezeniń «Ýoll-strıttik qasqyr» fılminde basty róldi somdaǵan Leonardo dı Kaprıoǵa buıyrýy múmkin. Al onyń qarsylastary retinde Krıstıan Beıl («Amerıkalyq afera»), Chıvetel Edjıofor («12 jyl quldyq»), Tom Henks («Kapıtan Fılıpps») jáne Brıýs Dern («Nebraska») syndy akterler qarastyrylýda.
Syılyqty saltanatty tabystaý rásimi Londonda 2014 jyldyń 16 aqpanynda ótedi. Byltyr BAFTA nusqasy boıynsha Ben Afflektiń «"Argo" operatsııasy» dramasy úzdik fılm dep tanylsa, brıtandyq keremet fılm ataǵyn Djeıms Bond týraly «007: Skaıfoll koordınattary» fılmi jeńip alǵan bolatyn.
Alfonso Kýaronnyń «Tartylys kúshi» fılmi 2013 jyly shyǵyp, 70-shi Venetsııa kınofestıvalin ashqan. 2013 jylǵy jalpy tabys boıynsha ol eń tabysty 10 fılmniń qataryna enip, 642,5 mıllıon dollar jınady. Oǵan kóbine tek jaǵymdy retsenzııalar jazylyp, jyldyń úzdik fılmderiniń kóptegen tizimderine endi. Djordj Klýnı de óz úlesin qosqan bul fılm «Altyn globýstyń» 4 atalymyna usynylyp, sondaı-aq, «Oskardyń» eń negizgi úmitkerleriniń biri retinde qarastyrylýda.
