Brıtandyq ınvestorlar Túrkistan oblysyn damytýǵa ınvestıtsııa salýǵa múddeli

TÚRKІSTAN. QazAqparat – Túrkistan oblysynyń sheteldik ınvestorlar arasynda tanymaldylyǵy artyp, oblys áleýeti jahandyq arenada jıi talqyǵa túsýde. FT Live Events uıymdastyrýymen London qalasynda ótken «Kazakhstan Global Investment Forum 2019» Qazaqstan-Brıtan ınvestıtsııalyq forýmynda saýda-ekonomıkalyq yntymaqtastyqty damytý máseleleri jáne ınvestıtsııalyq múmkindikter ortaǵa salyndy, dep habarlaıdy QazAqparat tilshisi.

Іs-shara Qazaqstannyń bıznes jáne ınvestıtsııa salasyndaǵy keń múmkindikteri men eldegi ekonomıkalyq jetistikterge arnaldy. Forýmǵa 400-den astam delegattar, Ulybrıtanııanyń jáne basqa elderdiń aýyl sharýashylyǵy, qurylys jáne týrızm salasyndaǵy korporatıvtik ınvestorlary bas qosty. Túrkistan oblysynyń atynan oblys ákiminiń orynbasary Meıirjan Myrzalıev bastaǵan «Turkistan invest», «Turkistan» arnaıy ekonomıkalyq jáne ındýstrıaldy aımaqtarynyń basqarýshy kompanııalarynyń basshylarynan quralǵan delegatsııa qatysty. «Road show» óńirler men arnaıy ekonomıkalyq aımaqtar paneldik sessııasynda Túrkistan oblysy tuńǵysh ret Qazaqstannyń jańa aımaǵy retinde sheteldik ınvestorlardyń nazaryna usynylyp, ınvestıtsııalyq jáne týrıstik áleýetine qyzyǵýshylyq týdyrýda. Jańa jobalardyń júzege asýy negizgi kapıtalǵa ınvestıtsııa salý ǵana emes, sonymen birge jańa jumys oryndarynyń ashylýyn, bilim men jańa tehnologııalar transferti arqyly aımaqtyń turaqty áleýmettik-ekonomıkalyq damýyn qamtamasyz etýge jol ashady. Paneldik sessııa sońynda Túrkistan oblysynyń delegatsııasy aýyl sharýashylyǵy, qurylys, týrızm jáne jańartylatyn energetıka salasyndaǵy jetekshi korporatıvti ınvestorlarmen 25-ten astam «G2B» kezdesýlerin ótkizdi. Іs-shara aıasynda «TURKISTAN» arnaıy ekonomıkalyq aımaǵyna úzdik erkin ekonomıkalyq aımaq qurǵany úshin «Global Free Zones of the Year 2019» syılyǵy berildi. Túrkistan oblysynyń delegatsııasy búkil álem boıynsha ınnovatsııalyq sheshimderdi usyný jáne ınvestıtsııalar tartý boıynsha iskerı aqparattyń tanymal álemdik kózi bolyp tabylatyn Financial Times-pen odan ári yntymaqtastyqty damytýdy jáne birneshe jobalardy júzege asyrýdy josparlap otyr. Aldaǵy ýaqytta Brıtandyq ınvestorlar men týrısterdiń aımaqpen tanysý jáne taraptar arasyndaǵy saýda-ekonomıkalyq qatynastardy nyǵaıtý maqsatynda Túrkistan oblysyna sapary kútilýde.