Brıtandyq ǵalymdar sý men aýadan otyn jasap shyǵardy
ASTANA. 21 qazan. QazAqparat - Brıtandyq ǵalymdar toby energetıkalyq daǵdarysty sheshýge kómektesetin, sondaı-aq Jer atmosferasyndaǵy kómirqyshqyl gazdyń úlesi azaıtatyn aýa komponentterinen otyn shyǵaratyn biregeı tehnologııa jasap shyǵardy,
dep jazady Glob-News saıty brıtandyq Independent gazetine silteme jasap.
Gazettiń alǵashy betinde «Eksklıýzıv» aıdarymen Anglııanyń soltústik-shyǵysyndaǵy Stokton-on-Tıs qalasynda brıtandyq Air Fuel Synthesis shaǵyn kompanııasy bıylǵy jylǵy tamyzdan bastap atmosferalyq jáne sý býy kómirqyshqyl gazy sıntezinen 5 lıtr otyn shyǵarǵanyn baıandaıdy.
«Biz aýadan kómirtegi dıoksıdin jáne sýdan sýtegini alyp, bul elementterdi otynǵa aınaldyrdyq. Budan buryn bizdiń elde de, bizge belgili shet elderde de muny eshkim jasaǵan joq. Suıyq zattyń benzın sııaqty ıisi bar, biraq ta munaıdan alynatyn benzınge qaraǵanda anaǵurlym taza ónim», - dep áńgimeledi Londondaǵy Mehanıkalyq ınjenerııa ınstıtýtynda óziniń ashylymyn jarııalaǵan kompanııa basshysy Pıter Harrıson.
Qazirgi kezde sıntezdeý úderisi eń bastapqy kezeńinde jáne ulttyq elektr jelisinen elektr energııasyn talap etedi, degenmen bolashaqta ony jasaýshylar energııany qaıtalama kózderden alýǵa úmittenip otyr. Kompanııa taıaýdaǵy eki jyldyń ishine kommertsııalyq aýqymda zaýyt salyp, kúnine osyndaı bir tonna otyn shyǵarmaq.
«Bul - jaqsy jańalyq. Eger jumys ilgerilep, jaqsy nátıjelerge jetkizse quba-qup», - dedi Mehanıkalyq ınjenerııa ınstıtýtynyń qorshaǵan orta jáne energetıka departamentiniń basshysy Tım Foks.
