Brıtandyq er azamattar áıelderiniń esebinen jıi kún kóre bastady - saýalnama qorytyndysy
ASTANA. Sáýirdiń 8-i. QazAqparat - Ulybrıtanııalyq qyz-kelinshekter mansap qurý jáne joǵary jalaqy alý máselesinde er azamattardy basyp oza bastady. Jaqynda júrgizilgen saýalnama qorytyndysy kórsetip otyrǵandaı, sońǵy 10 jylda bala baǵý jáne úı sharýashylyǵymen aınalysý úshin jumystaryn tastaýǵa sheshim qabyldaǵan brıtandyq er azamattardyń sany on esege artqan,
dep habarlaıdy The Telegraph basylymy.
Aviva saqtandyrý kompanııasy júrgizgen zertteýdiń nátıjesi kórsetip otyrǵandaı, qazirgi tańda bala-shaǵasy bar er azamattardyń 6 paıyzy «úıde otyryp, bala baǵýǵa» nıettenip otyr. Bul 600 myńdaı adam, al osydan 10 jyl buryn ondaı erkekterdiń sany tek 60 myń ǵana bolatyn. Respondentterdiń taǵy 18 paıyzy, bala baǵý mindetin áıelderimen teńdeı atqaratynyn aıtqan.
Erkekter «úı sharýasymen aınalysý» týraly sheshimderine, jubaılarynyń ózderinen áldeqaıda joǵary jalaqy alatyndyǵy basty sebep bolyp otyrǵan kórinedi. Qazirgi tańda kishkentaı balalary bar brıtandyq otbasylardyń 16 paıyzynda áıelder «negizgi tabys tabýshy» bolyp tabylady.
Bir aıta keterligi, áıelderdiń ózderi «otbasy asyraýshysynyń» roli aýyrlaý ekenin aıtyp otyr. Atap aıtqanda, olardyń 37 paıyzy, balalaryn qaldyryp, jumysqa ketip bara jatqanda, ózderin kináli sezinetinderin moıyndasa, taǵy 15 paıyzy - otaǵasynyń jumys istemeıtinine renishti. Taǵy 9 paıyzy, úıde otyryp, bala baǵý úshin, er azamattarmen oryn aýystyrǵylary keletinderin aıtqan.
Esesine, er azamattar mundaı jaǵdaıǵa rıza sııaqty. Olardyń 75 paıyzy, bala-shaǵamen kóbirek ýaqyt ótkize alatyndaryna baqytty ekenin aıtsa, 29 paıyzy - jumystan góri, úı sharýasynan lázzat alatyndaryn aıtqan. Tek 10 paıyzy ǵana jaǵdaıdyń bulaı bolýy olardyń azamattyq namystaryna tıetinin aıtsa, 17 paıyzy áıelderine qaraǵanda, kóbirek tabys tapqylary keletinin aıtqan.
