Brıtandyq depýtat Qazaqstandaǵy saılaý týraly oı bólisti
Qazaqstan jáne qazaqstandyqtar týraly
«Bul – meniń Qazaqstanǵa alǵashqy saparym. Men túrli dinder men halyqtardy qurmetteıtin óte tolerantty qoǵamdy kórdim. Astananyń qarqyndy damýyn, záýlim ǵımarattar, bıznes-draıv, kóshelerdiń tazalyǵy, uıymdastyrylǵan áleýeti joǵary qoǵamdy baıqadym», - dedi brıtandyq depýtat Londonǵa oralǵannan keıin.
«Men óte aqyldy, talǵampaz, joǵary bilimdi, álemge ashyq, dınamıkalyq, isker adamdardy kórdim, olar aıtarlyqtaı paıdaly qazbalar qory bar elde turady jáne Ulybrıtanııa Qazaqstannyń mańyzdylyǵyn neǵurlym tezirek túsinse, soǵurlym jaqsy», - dep jalǵastyrdy ol.
«Paıdaly qazbalar men sırek kezdesetin metaldardyń qomaqty qoryna ıe Qazaqstan men Mońǵolııa sııaqty elder baılyǵy jaǵynan jańa Kýveıt pen Saýd Arabııasy bola alady. Sondyqtan, Qazaqstan jáne Mońǵolııamen berik jáne ózara syılastyq qarym-qatynastar qurý bizdiń Úkimet úshin óte mańyzdy dep sanaımyn», - deıdi spıker.
Baıqaý kezinde túrtip alǵan oń tustar
Qaýymdar palatasynyń depýtaty Qazaqstandaǵy saılaýdyń uıymdastyrylýyna tánti boldy jáne ol óziniń esebinde brıtandyq parlamentshilerge birneshe usynysty qamtymaq.
«Birinshiden, saılaý ýchaskelerinde dárigerler men medbıkeler boldy. Qazaqstan úkimeti qarttardyń, júkti áıelderdiń jáne basqa da osal toptardyń saılaý ýchaskelerine qardy basyp keletinin eskergen. Bizde mundaı joq. Bul – birinshi usynys», - deıdi ol.
«Ekinshi usynys – saılaýdy adamdardyń daýys berýge ýaqyty bolýy úshin jeksenbi kúni ótkizý. Bizde saılaý beısenbide ótedi. Adamdar jumysta, sol sebepti ýaqyt tappaı kúızeledi. Jumys kúni olardyń turmystyq máseleleri bar jáne daýys berý árqashan qolaıly bola bermeıdi», - dedi Denıel Kavchınskı.
«Keıbir saılaý ýchaskelerinde mýzyka oınap turdy, bul halyqqa saılaýdy jaǵymdy etip kórsetedi. Men sondaı-aq, máslıhattar men Parlamenttiń tómengi palatasyna saılaýǵa qatysqan táýelsiz kandıdattardyń kóptigine tańqaldym. Oǵan áıelder, jastar jáne t.b. kóptep qatysty», - dedi brıtandyq parlamentshi.
Saılaý men Prezıdent Toqaevtyń reformasyn baǵalaý
«Prezıdent Toqaev – halyqaralyq deńgeıde joǵary qurmetke ıe, óte tájirıbeli dıplomat. Ol Prezıdent pen Parlament arasyndaǵy júıeni qaıta qurýǵa arnalǵan reformalardy júzege asyryp jatyr», - dedi Denıel Kavchınskı.
«Meniń oıymsha, saılaý ádil ári ashyq ótti. Ár ýchaskeden protsesti baqylaıtyn 20 nemese 25 baıqaýshyny kórdim. Bizde ondaı joq. Bul keremet dep oıladym. Men Qazaqstanda saılaý kóptegen batys elderinde kórgenimnen áldeqaıda jaqsy ótkiziledi dep aıtar edim. Qazaqstan qysqa ýaqyt ishinde uzaq joldan ótti», - dep esepteıdi parlamentshi.
«Aıtpaqshy, árbir saılaý ýchaskesinde Qazaqstannyń Týy men Eltańbasy boldy. Bizde ol joq. Meniń oıymsha, adamdar saılaýdyń mańyzdylyǵyn sezinýi úshin memlekettik Tý men Eltańbanyń bolýy óte mańyzdy», - dedi Qaýymdar palatasynyń depýtaty.
«Biraq, men úshin eń áserli sát saılaý ýchaskesiniń jumysy aıaqtalǵannan keıin jınalǵandardyń barlyǵy Qazaqstannyń memlekettik Ánuranyn shyrqaǵany boldy. Ánurannyń sózderi óte ótimdi jáne adamdar ony zor qurmetpen shyrqady. Men mundaıdy buryn-sońdy kórmegen edim, bul maǵan qatty áser etti», - dep qorytyndylady Denıel Kavchınskı.
