Brıtandyq azamat qonaqjaı qazaq eline alǵysyn bildirdi
AQTÓBE. QazAqparat - Saqtaǵan Báıishev atyndaǵy ǵylymı-ámbebap kitaphanasynyń amerıkandyq buryshynda áýlıe Patrık kúni ótti. Ulybrıtanııa turǵyny Maıkl Sagatıs qazaqtyń qonaqjaılylyǵyna alǵysyn bildirdi, dep habarlaıdy QazAqparat tilshisi.
Kitaphananyń brıtandyq buryshyna mektep oqýshylary, stýdentter men aǵylshyn tilin oqyp júrgen qala turǵyndary jınaldy. Olar áýlıe Patrık kúnine arnalǵan beınejazbany kórdi. Irlandııa men ırlandyqtar qonystanǵan elderde ótetin meıram Aqtóbede de ataýsyz qalmady. Bas qosqan jastarǵa qaǵaz taratylyp, tańqaldyrǵan jaǵdaılar týraly jazý tapsyryldy. Aqtóbege kelip, óziniń ájesi Jozef Býıdony izdep júrgen Ulybrıtanııa turǵyny Maıkl Sagatıs qazaq halqynyń qonaqjaılylyǵyna tańqalǵanyn jasyrmady.
«Men qazaq halqynyń keńpeıildiligine alǵys aıtamyn. Eki kún buryn noýtbýktiń qýaty óship, batareıasy synyp qaldy. Meniń dosym Samat dúkenderdi menimen birge aralap, qajetti úlgisin izdeýge shyqty. Biraq tabylmady. Keıin ınternet arqyly tapsyrys berdi. Jan-jaǵymda jaqsy adamdar kóp. Tipti jergilikti monshaǵa barǵan kezde jumys isteıtin adamdar meni qonaqqa shaqyrdy. Qazaqtyń ulttyq taǵamy, et asqany maǵan unaıdy. Taǵamy óte dámdi», - dedi M.Sagatıs. 
Qazaqtyń ulttyq mádenıeti, mýzykasy da sheteldik qonaqqa unady. Ol Jubanovtar álemi ortalyǵynda bolyp, dombyra, jetigen aspaptarymen tanysty.
«Qazaqtyń ulttyq astaptary maǵan unady. Jubanovtar álemine baryp, dombyra men jetigenniń únin tyńdadym. Qazaqtar karaokede án shyrqaǵandy unatady eken. Men de qosyla shyrqadym», - dedi brıtandyq azamat.
Aıta keteıik, M.Sagatıs erteń týǵan ólkesi Ýels qalasyna jolǵa shyǵady. Degenmen osy jyldyń jaz aılarynda qaıta kelip, óziniń ájesin izdeý jumystaryn jalǵastyrady. Ol Aqtóbege 2017 jyldyń jeltoqsan aıynda kelgen bolatyn. Ulybrıtanııa azamaty 1940 jyly Shyǵys Polshadan Aqtóbege jer aýdarǵan ıÝzef Býıdony izdep júr.
Derekterge súıensek, ıÝ.Býıdo Aqtóbe qalasynda turyp, keıin Alǵa aýdanynyń Shıbaevka aýylyna qonys aýdarǵan. Ol týraly brıtandyq azamat eki jyl buryn ǵana bildi. M.Sagatıs ájesiniń Qazaqstannan Polshaǵa jazylǵan hattaryn taýyp alǵan.
