Brıtandyq ánshi Adel 2015 jyldyń eń tabysty oryndaýshysy atandy
ASTANA. QazAqparat - Álemge tanymal ánshi Adel Halyqaralyq grammjazbalar federatsııasynyń (IFPI) nusqasy boıynsha ótken jyldyń eń tabysty oryndaýshysy atandy. Bul týraly The Guardian gazeti habarlady.
Ekinshi oryn Ulybrıtanııa oryndaýshysy Ed Shıranǵa berildi. Úshinshi orynǵa ótken jylǵy reıtıngte kósh bastaǵan Teılor Svıft turaqtady.
Atalǵan uıymnyń jyl saıynǵy reıtıngisine irikteýde - aýdıojazbalar satylymynyń jalpy kólemi, sondaı-aq negizgi strımıng-qyzmetterdegi tyńdaýlardyń sany eskeriledi.
Ótken jyly Adeldiń esimi birden birneshe rekordpen baılanysty boldy. 22 qazanda jarııalanǵan onyń «Hello» áni 12 saǵattyń ishinde 85 eldiń iTunes charttarynda birinshi orynǵa kóterildi, týyndynyń beınebaıany nebári 87 kúnniń ishinde Youtube vıdeohostınginde 1 mıllıard ret qaraldy.
