Brıtandyqtar Johnson & Johnson kompanııasyn qaýipti balalar untaǵyn satqan dep aıyptady

ASTANA. KAZINFORM – Talapkerlerdiń aıtýynsha, kompanııa quramynda asbest bar ónimdi ádeıi satyp, onyń qaýiptiligin qoǵamnan jasyrǵan, dep habarlaıdy Kazinform agenttiginiń menshikti tilshisi. 

Olardyń málimdeýinshe, amerıkalyq farmatsevtıkalyq kompanııa izbespen lastanǵan talk negizindegi balalar untaǵyn ádeıi satýmen aınalysqan, dep jazady The Guardian gazeti.

Talapkerlerdiń sózinshe, ózderi nemese týystary Johnson’s Baby Powder balalar untaǵyn qoldanǵannan keıin analyq bez obyry nemese mezotelıoma (izbes áserinen paıda bolatyn qaterli isik túri) dertine shaldyqqan. Olar Anglııa soty arqyly ótemaqy talap etip otyr.

Mezotelıoma — kóbine izbestiń áserinen paıda bolatyn qaterli isik túri. Ol, ádette, ókpede damıdy, sebebi adam mıneraldyń mıkroskopııalyq talshyqtaryn jutyp qoıady.

Advokattardyń aıtýynsha, Johnson & Johnson ondaǵan jyl boıy bul táýekel týraly aqparatty jurtshylyqtan jasyrǵan. Keıin kompanııa ónim quramyndaǵy talkty júgeri krahmalyna aýystyrǵan, alaıda talk negizindegi untaq óndirisin jáne satylymyn Ulybrıtanııada jáne búkil álemde tek 2023 jyly ǵana toqtatty, ıaǵnı AQSh pen Kanadada satylymnan alynǵannan keıin úsh jyl ótken soń.

Johnson & Johnson barlyq aıyptaýdy, sonyń ishinde izbespen lastanǵan untaqty ádeıi satty degen málimdemelerdi joqqa shyǵaryp otyr. Kompanııanyń burynǵy bólimshesi bolyp, eki jyl buryn jeke qurylymǵa bólinip shyqqan jáne AQSh pen Kanadadan tys talkke qatysty istermen aınalysatyn Kenvue ókiliniń aıtýynsha, paıdalanylǵan talk normatıvtik talaptarǵa saı bolǵan, quramynda izbes bolmaǵan jáne qaterli isik týǵyzbaıdy.

Johnson & Johnson ónimderinde qoldanylǵan talk tabıǵı mıneral, ol kóbine izbes ken oryndarynyń mańynan óndiriledi. Dúnıejúzilik densaýlyq saqtaý uıymynyń derekteri boıynsha, izbestiń kez kelgen túri birneshe túrli qaterli isik aýrýyn týdyra alady jáne sozylmaly tynys alý joldary aýrýlaryna ákelýi múmkin.

Advokattar ózderiniń talap-aryzdarynda óndiristik aýqymda óńdeýge jaramdy ári izbesten tolyq taza talk ken oryndary álemde óte az ekenin málimdedi. Olardyń aıtýynsha, jaýapker kompanııaǵa talk jetkizgen barlyq shahta izbespen lastanǵan.

Sondaı-aq osy shahtalar boıynsha jasalǵan esepter, kompanııanyń óz zertteýleri men ǵylymı jarııalanymdar Johnson & Johnson-dy talktiń izbesten lastaný qaýpi týraly habardar etýge tıis bolǵan. Alaıda kompanııa, talapkerlerdiń aıtýynsha, balalar untaǵynyń qaýipti bolýy múmkin ekendigin kórsetetin aqparatty ádeıi jasyryp kelgen.

Sonymen qatar Johnson & Johnson retteýshi organdarǵa qysym jasap, ónim satylymyn jalǵastyrýǵa tyrysqan jáne adamnyń densaýlyǵyna qaýiptiń tómen ekendigin kórsetý maqsatynda zertteýlerdi qarjylandyrǵan dep habarlanady.

Ulybrıtanııadaǵy bul oqıǵa AQSh-taǵy aýqymdy sot isteriniń jalǵasy ispettes, onda da Johnson & Johnson kompanııasyna qarsy osyndaı mazmundaǵy kóptegen talap-aryz berilgen. Keı jaǵdaılarda talapkerler mıllıardtaǵan dollar kóleminde ótemaqy alsa, kompanııa keı apellıatsııalarda óz paıdasyna sheshim shyǵartýǵa qol jetkizgen.

Advokattardyń baǵalaýynsha, Ulybrıtanııada óndirilip alynýy múmkin ótemaqy somasy júzdegen mıllıon fýnt sterlıngke jetýi yqtımal. BBC atap ótkendeı, bul is el tarıhyndaǵy ónim sapasyna qatysty eń iri sot protsesi bolýy múmkin.

Buǵan deıin AQSh soty Johnson & Johnson kompanııasyn balalar untaǵynyń qaterli isik týdyrǵany úshin shamamen 1 mıllıard AQSh dollary kóleminde ótemaqy tóleýge mindettegen edi.