Brıtandyq jankúıerler Dastan Sátpaevtyń alańǵa oralýyn kútedi
ASTANA. KAZINFORM — Brıtandyq CarefreeYouth akkaýnty X áleýmettik jelisinde qazaqstandyq shabýylshy Dastan Sátpaevtyń KPR-ǵa qarsy matchta «Bernlı» klýbynyń sapynda bolmaýyna qatysty pikir bildirdi, dep habarlaıdy Sports.kz.
Jazba avtory shabýylshynyń aldaǵy kezdesýge arnalǵan quramǵa qosylmaǵanyna nazar aýdaryp, onyń tezirek saýyǵyp ketýin tiledi.
— Sátpaev jaraqatyna baılanysty komanda quramyna enbedi. Halyqaralyq úzilisten keıin qatarǵa qosylady dep úmittenemin. Sondaı-aq jańa bas bapker maýsym barysyn ózgerte alady dep senemin. Óıtkeni qazir komanda tómengi lıgaǵa túsip qalý aımaǵynda tur, — dep jazdy CarefreeYouth.
Aıta keteıik, qazaqstandyq fýtbolshynyń qatardan tys qalýyna sannyń artqy bulshyqetiniń jaraqaty sebep bolǵan. Buǵan deıin «Bernlıdiń» bas bapkeri Fabıo Chelestını klýb fýtbolshynyń quqyǵyna ıe «Chelsımen» birlesip, onyń jaǵdaıyn baǵalap jatqanyn aıtqan edi. 18 jastaǵy shabýylshynyń naqty qashan alańǵa oralatyny ázirge belgisiz.
Chempıonshıptiń 14-týry aıasyndaǵy KPR-ǵa qarsy match Londondaǵy «Loftýs Roýd» stadıonynda ótti. Kezdesý búgin, 4 qarashada Qazaqstan ýaqytymen 00:45–te bastaldy.
Kezdesý nátıjesi
Matchtaǵy alǵashqy goldy 38-mınýtta «Bernlı» sapynan Larjı Ramazanı soqty. Ol Djeımı Vardı bergen pastan keıin alystan dál soqqy jasady. Al 65-mınýtta alań ıeleri Djonatan Varan golynyń arqasynda esepti teńestirdi. Qalǵan ýaqytta komandalar nátıjeni ózgerte almady. Kezdesý 1:1 esebimen aıaqtaldy.
Qazaqstandyq shabýylshy Dastan Sátpaev komandanyń jańa bas bapkeri Fabıo Chelestını jetekshilik etken alǵashqy oıynda da «Portsmýtqa» qarsy alańǵa shyqpaǵan edi. Ol kezdesýde «Bernlı» 0:0 esebimen teń tústi.
Bul — «Bernlıdiń» Chempıonshıptegi qatarynan besinshi sátsiz oıyny. Buǵan deıin komanda syrt alańda «Ýotfordty» 4:0 esebimen jeńip, maýsymdaǵy alǵashqy jeńisine qol jetkizgen edi.
Chelestını qazan aıynyń sońynda Nıkkı Haıenniń ornyna «Bernlıdiń» bas bapkeri bolyp taǵaıyndaldy. Chempıonshıptiń 13 týrynda komanda 9 upaı jınasa, KPR-men teń túskennen keıin enshisinde 10 upaı bar. Qazir komanda 22-orynǵa turaqtady. Endi klýbtyń tómengi lıgaǵa túsip qalý qaýpi bar.
Buǵan deıin Dastan Sátpaevtyń qashan 90 mınýt oınaýǵa daıyn bolatyny týraly jazǵan bolatynbyz.
