Brıtandyq sportshy Ormýz buǵazyn úsh kúnde júzip ótti

ASTANA. KAZINFORM – Brıtandyq júzýshi Lıýıs Pıý Iran qatysqan qaqtyǵystyń qorshaǵan ortaǵa tıgizetin zardabyna nazar aýdartý úshin Ormýz buǵazynda úsh kún boıy júzip, shamamen 15 shaqyrym qashyqtyqty eńserdi, dep habarlaıdy BBC.

Brıtanskıı plovets sovershıl trehdnevnyı zaplyv cherez Ormýzskıı prolıv
Foto: BBC

56 jastaǵy Lıýıs Pıý – Ulybrıtanııanyń Devon graftyǵyndaǵy Plımýt qalasynyń týmasy, BUU-nyń muhıttardy qorǵaý jónindegi qamqorshysy.

Ol Taıaý Shyǵystan munaı tasymaldaıtyn álemdegi eń mańyzdy teńiz joldarynyń biri – Ormýz buǵazynda úsh kúndik júzý saparyn júzege asyrdy.

Sportshy buǵazdaǵy Mýsandam aralynan Omannyń Mýsandam túbeginiń soltústik shetindegi Ormýz múıisine deıin shamamen 15 shaqyrym júzip ótken.

Boljam boıynsha, Pıý naýryz aıynda qaqtyǵys bastalǵaly beri Ormýz buǵazynda uzaq qashyqtyqqa júzýge áreket jasaǵan alǵashqy adam bolýy múmkin.

Lıýıs Pıý qorynyń málimetinshe, júzýdiń alǵashqy kúni sportshydan shamamen tórt shaqyrym jerde munaı tankerine snarıad tıgen.

Brıtanskıı plovets sovershıl trehdnevnyı zaplyv cherez Ormýzskıı prolıv
Foto: BBC

Ekinshi kúni ol ózi júzip kele jatqan baǵyttaǵy múıistiń ar jaǵynan kóterilgen jalyndy baıqaǵan. Onda suıytylǵan munaı gazyn tasymaldaǵan Tara Gas kemesi órtenip jatqan. Keıin sportshy órt áli sónbegen kezde kemeniń mańynan júzip ótken.

– Eń aldymen kemeniń bortyndaǵy teńizshilerdi oıladym. Jalyn óte kúshti boldy. Mundaı kemeler tez tutanatyn gaz tasymaldaıdy. Olardyń birine jasalǵan shabýyl ekıpaj úshin ǵana emes, teńiz ekojúıesi úshin de apatty saldarǵa ákelýi múmkin, – dedi Pıý.

Júzgishtiń aıtýynsha, qarýly qaqtyǵystardyń ekologııalyq zardabyna adam shyǵyny men qıratýlarǵa qaraǵanda áldeqaıda az kóńil bólinedi.

– Qaqtyǵys adamdarǵa orasan zor qaıǵy-qasiret ákeledi. Adamdar qaza tabady, otbasylar oıran bolady, úıler, aýrýhanalar men mektepter sanaýly mınýtta qıraýy múmkin. Biraq nazardan tys qalyp jatqan taǵy bir qurban bar. Ol – tabıǵattyń ózi. Oǵan keltirilgen zııan soǵys qımyldary toqtaǵannan keıin de uzaq ýaqyt saqtalýy múmkin, – dedi ol.

Brıtanskıı plovets sovershıl trehdnevnyı zaplyv cherez Ormýzskıı prolıv
Foto: BBC

Lıýıs Pıý osy júzý sapary arqyly soǵys qımyldaryn toqtatýǵa, Ormýz buǵazyn qaıta ashýǵa jáne qaqtyǵystan kelgen ekologııalyq zııandy joıýǵa shaqyrdy.

Ormýz buǵazy – álemdegi asa mańyzdy teńiz kólik joldarynyń biri. Onyń sý aıdynynda dıýgondar, teńiz tasbaqalary men kıt akýlalary mekendeıdi.

Aıta keteıik, buǵan deıin 17 qarashada Ormýz buǵazynda munaı tankeri men gaz tasymaldaıtyn kemeniń teńiz mınalaryna soǵylyp, órtengeni habarlanǵan edi.