Brıtandyq sot Soltústik teńizdegi munaı-gaz jobalaryna tyıym saldy
ASTANA.KAZINFORM - Brıtan úkimetiniń Soltústik teńizdegi "Roýzbank" pen "Djekdoý" munaı-gaz ken oryndarynda kómirtegi qaldyǵyn esepke almaı ıgerýge ruqsat berýi zańsyz dep tanyldy.
Ulybrıtanııanyń eń iri ıgerilmegen munaı ken orny, Soltústik teńizdegi "Roýzbankty" ıgerýge 2023 jyly, al "Djekdoý" gaz ken ornyn ıgerýge 2022 jyly ruqsat berilgen.
Alaıda beısenbide Edınbýrg soty kómirtegi shyǵaryndylaryn esepke almaǵandyqtan, bul sheshimder zańǵa qaıshy qabyldanǵan dep sheshti. Osyǵan baılanysty sot jobalardy brıtandyq mınıstrler kabınetine qaıta qaraý úshin qaıtarýdy buıyrdy.
Úkimet kómirtegi shyǵaryndylaryn esepke alý úshin ekologııalyq standarttardy jańartyp jatqanyn aıtty. Jańa erejeler kóktemde tanystyrylady, sodan keıin kompanııalar jańartylǵan ereje boıynsha ruqsat alýǵa ótinish bere alady.
Qorshaǵan ortany qorǵaý jónindegi úgit-nasıhatshylar "Roýzbank" munaıynyń kóp bóligi eksporttalatynyn jáne brıtandyqtardyń energııa shyǵyndaryn tómendetpeıtinin aıtady. Bul rette paıdanyń edáýir bóligi norvegııalyq Equinor kompanııasyna túsedi.
Buǵan deıin British Petroleum 5 paıyzdan astam qyzmetkerlerin qysqartýǵa nıetti ekeni habarlanǵan bolatyn.