Brıtandyq saıahatshy eki muhıtty 327 kúnde jalǵyz ózi qaıyqpen júzip ótti
ASTANA. KAZINFORM – Brıtandyq saıahatshy Deıv Bell Tynyq jáne Úndi muhıttaryn eskekti qaıyqpen jalǵyz júzip ótip, saparyn aıaqtady. Ol 327 kún 16 saǵatta 15,5 myń teńiz mılin, ıaǵnı shamamen 28,7 myń shaqyrymdy eńserdi, dep habarlaıdy TASS.
Bell Perýden ótken jylǵy 9 qarashada jolǵa shyqqan. 2 qazanda Kenııanyń Kılıfı qalasy mańyndaǵy jaǵalaýǵa jetti. 54 jastaǵy burynǵy teńiz jaıaý áskeri uzyndyǵy 8,3 metr bolatyn karbondy Billy No Mates qaıyǵymen sapar shekken.
Saıahat rekord ornatý talaptaryna saı júrgizildi. Bell jaǵaǵa shyǵa almady jáne basqa adamdardan fızıkalyq kómek qabyldamady. Ol kún saıyn shamamen 12 saǵat eskek esken, navıgatsııamen, tamaq ázirleýmen jáne qaıyqty jóndeýmen ózi aınalysqan.
Sapar barysynda saıahatshy qaıyqtyń rólin úsh ret jóndeýge májbúr bolǵan. Tehnıkalyq qıyndyqtarǵa qaramastan, ol qozǵalysyn toqtatpaı, Kenııa jaǵalaýyna deıin jetti.
– Djordjıge qaıta oralǵanyma óte qýanyshtymyn. Ómirimdegi eń uzaq dýshty qabyldap, kádimgi tósekte uıyqtaýdy asyǵa kútip otyrmyn, – dedi Bell sapary aıaqtalǵannan keıin.
Ekspedıtsııa kezinde brıtandyq saıahatshy áskerı qyzmetshilerge, ardagerlerge, olardyń otbasylaryna jáne kúızeliske ushyraǵan tótenshe jaǵdaılar qyzmetkerlerine kómek kórsetetin qaıyrymdylyq uıymyna qarajat jınady. Jınalǵan qarajat 112 myń fýnt sterlıngten, ıaǵnı shamamen 148 myń dollardan asty.
Bell eskekpen muhıtty jalǵyz kesip ótý boıynsha burynǵy rekordty jańartýdy kózdep otyr. Qazirgi rekord amerıkalyq Djeıkob Adoramǵa tıesili. Ol 2019 jyly AQSh-taǵy Nea-Beıden Aýstralııanyń Kerns qalasy mańyndaǵy jaǵalaýǵa deıin 6 140 teńiz mılin (11,37 myń shaqyrym) júzip ótken.
Adoramǵa Tynyq muhıtyn shyǵystan batysqa qaraı kesip ótýge 335 kún 22 saǵat 30 mınýt qajet bolǵan. Belldiń nátıjesi jańa rekord retinde resmı túrde qaralýy tıis.
Aıta keteıik, buǵan deıin qazaqstandyq Búrlen Ádiletqyzy velosıpedpen 76 kúnde elimizdiń 19 qalasyn aralap shyqqan. Ol saparyn Aqtaýdan bastap, Astanada aıaqtaǵan.
