Brıtandyq kompanııalarmen jáne JOO-larmen yntymaqtastyq nyǵaıady - zań
ASTANA. KAZINFORM – Búgin Senat «Qazaqstan men Ulybrıtanııa jáne Soltústik Irlandııa Qurama Koroldigi arasyndaǵy strategııalyq áriptestik pen yntymaqtastyq týraly kelisimdi ratıfıkatsııalaý týraly» Zańdy maquldady.
Kelisim saıası, ekonomıkalyq, quqyqtyq, gýmanıtarlyq jáne ekologııalyq ózara is-qımyldyń negizgi qaǵıdalaryn bekitip, qazaq-brıtan yntymaqtastyǵyn sapalyq jańa deńgeıge kóteredi.
- Ekonomıkalyq turǵydan alǵanda, Kelisim ınvestıtsııalar tartýǵa, saýdany damytýǵa jáne Qazaqstan úshin basym sektorlarda – energetıka men jańartylatyn energııa kózderi, taý-ken ónerkásibi, joǵary tehnologııalar men tsıfrlandyrý, qarjy qyzmetteri, aýyl sharýashylyǵy jáne ornyqty sý paıdalaný boıynsha birlesken jobalardy iske asyrýǵa jańa múmkindikter ashady. Ulybrıtanııa - Qazaqstan ekonomıkasyna 23 mlrd AQSh dollarynan astam tikeleı ınvestıtsııa salǵan iri ınvestorlardyń biri. Kelisimdi ratıfıkatsııalaý elimizdiń boljamdy quqyqtyq ortasy men ashyq bıznes júrgizý qaǵıdattary bar senimdi seriktes retindegi bedelin nyǵaıtady. Óńir úshin bul – kapıtaldyń kelýin, brıtandyq kompanııalarmen jáne ýnıversıtettermen tikeleı yntymaqtastyq ornatý múmkindigin bildiredi, - dedi senator Gennadıı Shıpovskıh.
Depýtattyń aıtýynsha, kelisimde quqyqtyq yntymaqtastyqqa erekshe nazar aýdarylǵan. Qujat eki eldiń sot jáne quqyq qorǵaý organdary arasyndaǵy ózara is-qımyldy damytýǵa, quqyq ústemdigi men sot tóreligi salasynda tájirıbe almasýǵa, sondaı-aq ózara quqyqtyq kómek, sot sheshimderin oryndaý máselelerinde úılestirýdi nyǵaıtýǵa baǵyttalǵan.
- Mádenı-gýmanıtarlyq yntymaqtastyq salasynda Kelisim birlesken bilim berý baǵdarlamalaryn, brıtandyq joǵary oqý oryndarynyń fılıaldaryn ashýǵa, stýdentter men oqytýshylar almasýyn keńeıtýge múmkindik beredi. Sondaı-aq qujat birlesken kórmeler men festıvalderdi ótkizýge, murajaılar men muraǵattar arasynda tájirıbe almasýǵa jol ashady. Ekologııa, «jasyl» ekonomıka jáne klımattyń ózgerýine beıimdelý salasyndaǵy yntymaqtastyq ta erekshe mánge ıe. Ulybrıtanııa - klımattyq tehnologııalardy ilgeriletý boıynsha kóshbasshylardyń biri jáne bul tájirıbe Qazaqstannyń 2060 jylǵa deıingi kómirtegi beıtaraptyǵyna qol jetkizý maqsatynda paıdaly bolmaq, - dedi ol.
Budan buryn habarlanǵandaı, Qazaqstan men Ulybrıtanııa sırek metaldar salasynda ózara tıimdi áriptestik ornatýǵa nıetti.
