Brıtandyq barlaý qyzmetiniń burynǵy basshysy AQSh-tyń Iranǵa qatysty josparyn baǵalady

ASTANA. KAZINFORM - Brıtandyq barlaý qyzmeti MI6-tyń burynǵy basshysy Djon Soers Taıaý Shyǵystaǵy shıeleniske qatysty pikir bildirdi, dep habarlaıdy Kazinform agenttiginiń menshikti tilshisi.

AQSh-tyń qaqtyǵysqa tartylý yqtımaldyǵy

Ulybrıtanııanyń Halyqaralyq qatynastar jónindegi koroldik ınstıtýty — «Chatem Haýs» konferentsııasynda sóılegen sózinde Djon Soers Izraıldiń áreketteri AQSh pen onyń odaqtastaryn qaqtyǵysqa tartýy múmkin ekenin aıtyp, munyń saldary boljap bolmaıtynyn atap ótti.

- Izraıldikter bizdi qaqtyǵysqa tikeleı aralastyrǵysy keledi. Ondaǵy maqsat – Irannyń ıadrolyq baǵdarlamasyn joıý. Izraıl Irannyń ýrandy baıytatyn «Fordo» zaýytyn joıa almaıdy. Sebebi olarda mundaı qarý joq. Onyń ústine «Fordo» eń myqty qorǵalǵan nysandardyń biri, - dedi Soers.

Onyń sózinshe, AQSh Irannyń ıadrolyq nysandaryna soqqy berýi ábden múmkin. Olaı bolǵan kúnde olar negizinen ýrandy baıytatyn jerasty zaýyttaryn kózdeıdi. Olardyń qatarynda «Fordo», Natanzdaǵy nysan jáne «Kırka taýy» dep atalatyn oryndy ataýǵa bolady.

Soers Irannyń qupııa obektisi — «Fordony» joıý tek AQSh-tyń ǵana qolynan keletinin aıtty. Sebebi ondaı qarý tek AQSh-ta ǵana bar. Bul — qupııa bombalaýshylarmen jetkiziletin býnkerge qarsy bombalar.

— Amerıkalyqtar bul nysandardyń barlyǵyna soqqy bere alady. Biraq kez kelgen áskerı operatsııada belgili bir kúmán bolady, aldyn ala naqty boljaý qıyn. AQSh bul isti júzege asyra alady, biraq olar 30 myń fýnttyq eki nemese úsh bombany bir jerge dál túsire alady dep tolyq senimmen aıtýǵa bolmaıdy. Qajetti tereńdikke jetý úshin dáldik asa mańyzdy. Sondyqtan táýekel áli de bar, — dep atap ótti brıtandyq barlaý qyzmetiniń burynǵy basshysy.

Endi ne bolady?

Djon Soerstiń pikirinshe, AQSh Irannyń ýran baıytý zaýyttaryna soqqy jasaıtyn bolsa, Tegeran buny jaýapsyz qaldyrmaıdy. Iran kek alýǵa tyrysady, al bul óz kezeginde búkil álemdegi amerıkalyq jáne ızraıldik nysandarǵa qaýipti kúsheıtedi.

Ulybrıtanııanyń ustanymy

Mundaı jaǵdaıda Ulybrıtanııa qalaı áreket etpek ?. Djon Soerstiń pikirinshe, Ulybrıtanııa qaqtyǵysqa tikeleı aralaspaýy kerek. Kır Starmer jetekshilik etetin qazirgi ákimshilik te osyndaı ustanymda otyrǵan bolýy kerek.

Degenmen, ol AQSh-tyń Ulybrıtanııadan naqty kómek suraýy múmkin ekenin joqqa shyǵarmaıdy. Soers Ulybrıtanııa AQSh-qa Iranǵa qarsy operatsııa júrgizý úshin Dıego-Garsııa aralyndaǵy áskerı bazany paıdalanýǵa ruqsat berýi múmkin ekenin aıtty.

— Eger amerıkalyq bombalaýshylar soqqy jasaıtyn bolsa, olar muny Dıego-Garsııadaǵy bazadan jasaıdy. Aıta ketý kerek, biz jýyrda osy bazany paıdalanýǵa ruqsat beretin uzaq merzimdi kelisimge qol qoıdyq, — dep qosty ol.

Osyǵan deıin Iran daǵdarysy AQSh senatyndaǵy daý-damaıdyń tasasynda qalǵany týraly jazǵan edik.