Brıtandyq barlaý qyzmeti jasyryn ınternet arqyly tyńshylardy tartpaq

ASTANA. KAZINFORM – Ulybrıtanııanyń syrtqy barlaý qyzmeti MI6 jasyryn ınternette (darknet) jańa portal ashyp, shpıondar tartý júıesin iske qosty, dep habarlaıdy agenttiktiń menshikti tilshisi.

Úkimettiń resmı saıtyndaǵy málimetke sáıkes, bul platforma qupııa aqparat almasýǵa múmkindik berip, kez kelgen adamǵa álemniń qaı núktesinde bolsa da óz qyzmetin qaýipsiz túrde usynýǵa jaǵdaı jasaıdy.

«Álem ózgerip jatyr, qaýip-qaterler artýda. Biz qarsylastarymyzdan bir qadam alda bolýymyz kerek. Bizdiń úzdik barlaý agenttikterimiz brıtandyqtardyń qaýipsizdigi úshin kórinbeıtin maıdanda jumys istep keledi. Endi biz olardyń múmkindikterin jańa tehnologııalar arqyly kúsheıtemiz. MI6 Reseıde de, álemniń kez kelgen elinde de jańa agentterdi tarta alady», – dedi Ulybrıtanııanyń syrtqy ister mınıstri Ivett Kýper.

MI6 basshysy Rıchard Mýr da jańa bastamanyń mańyzyn atap ótti.

«Bizge jahandyq turaqsyzdyq, halyqaralyq terrorızm nemese dushpan memleketterdiń qyzmeti týraly qupııa aqparat bere alatyndar qajet. MI6-men endi onlaın rejımde qaýipsiz baılanys ornatýǵa bolady. Bizdiń vırtýaldy esigimiz ashyq», – dedi ol.

Jańa portal AQSh-tyń Ortalyq barlaý basqarmasynyń tájirıbesine súıenip jasalǵan. Qajetti nusqaýlyqtar brıtandyq barlaý qyzmetiniń resmı YouTube-arnasynda jarııalanady.

Eske salsaq, buǵan deıin habarlanǵandaı, Ulybrıtanııa Reseıge qarsy sanktsııalar tizimin keńeıtti.