Brıtandyq ánshi Samsung kompanııasyn sotqa berdi
ASTANA. KAZINFORM — Brıtandyq pop-juldyz Dýa Lıpa sýretin ruqsatsyz paıdalanǵany úshin Samsung kompanııasyn sotqa berip, odan 15 mln dollar talap etti, dep jazdy VVS.
Ánshiniń aıtýynsha, kompanııa onyń fotosýretin televızorlar men TV-prıstavkalardyń qaptamasyna ruqsatsyz paıdalanǵan.
Qazirgi ýaqytta Dýa Lıpa Puma, Versace jáne Yves Saint Laurent sııaqty birneshe iri brendtermen jumys isteıdi. Buǵan deıin ol Apple, Porsche, Chanel kompanııalarynyń jarnamasyna túsken jáne jaqynda Nespresso-nyń jahandyq ambassadory atanǵan.
Shaǵym Kalıfornııanyń ortalyq okrýgi boıynsha AQSh okrýgtik sotyna berildi. Aryzda Samsung tutynýshylardyń nazaryn aýdarý jáne satylymdardy arttyrý úshin ánshiniń beınesin birneshe qurylǵylaryna ornalastyrǵany aıtylady.
Dýa Lıpanyń ókilderi kompanııa juldyzdyń tanymaldyǵyn kommertsııalyq maqsatta paıdalandy dep sanaıdy. Aryzda qurylǵylardyń qaptamasy ánshiniń beınesimen baılanysty bolatyndaı etip jasalǵany jáne onyń tanymaldyǵynan paıda tabý maqsatynda qoldanylǵany kórsetilgen.
Sonymen qatar, ánshiniń tarapynan Samsung avtorlyq quqyqty buzdy, taýar belgisin zańsyz qoldandy jáne onyń beınesin óz paıdasyna paıdalandy dep aıyptalyp otyr. Fotosýret 2024 jyly Austin City Limits Music Festival mýzykalyq festıvali kezinde túsirilgen. Lıpa sýretke quqyq ıelenetinin aıtady.
Sot qujattaryna sáıkes, ánshi óz beınesiniń Samsung ónimderinde paıda bolǵanyn tek 2025 jyldyń jaz aıynda bilgen. Áleýmettik jeli qoldanýshylary kompanııanyń ónimderin belsendi talqylap, olardy «Dýa Lıpanyń TV-prıstavkasy» dep atap ketken.
Aryzda Instagram paıdalanýshylarynyń pikirleri de keltirilgen. Bireý tek ánshiniń sýreti salynǵany úshin televızor satyp alýǵa daıyn ekenin jazsa, ekinshisi «satylymdy jaqsartý úshin tek Dýa Lıpanyń fotosýretin ornalastyrý jetkilikti» dep pikir bildirgen.
Ánshiniń advokattary Samsung birneshe ret fotosýretti paıdalanýdy toqtatý talabyn elemedi dep málimdedi.
Aıta keteıik, Úndistanda mýzyka daýsynan 140 taýyq qyrylyp qaldy. Fermer dıdjeıdi sotqa berdi.
