Brıtan polıtsııasy qashyqtan skanerleý arqyly adamdardan qarý-jaraq izdeı alady
ASTANA. KAZINFORM - Brıtandyq polıtseıler qala kóshelerimen serýendep júrgen adamdardy kıimderiniń astynda qarý-jaraqtyń bar-joǵyn jasyryn teksere alady.
«Kelesi jyly engizilýi múmkin jańa tehnologııa tártip saqshylaryna jurtshylyq kóp jınalatyn jerlerde alty metrge deıingi qashyqtyqta kıim, tipti qalyń palto men beldik astynan pyshaqtardyń bar-joǵyn anyqtaýǵa múmkindik beredi», - dep jazdy The Standard.
Bul tehnologııany engizýdi jedeldetý úshin Ulybrıtanııa úkimeti 460 myńnan astam fýnt sterlıng bóldi. Ony qoldaný jazyqsyz adamdardy tutqyndaý men tintý sanyn azaıtýdy kózdeıdi.
Londonda pyshaq qoldanǵan qylmys sanynyń ósýi baıqalady: Ulybrıtanııa astanasynda 2022 jyldyń shildesi men 2023 jyldyń maýsymy aralyǵynda 13 503 oqıǵa tirkeldi, bul aldyńǵy 12 aılyq kezeńmen salystyrǵanda 20 paıyzǵa kóp.
