Brıtan polıtsııasy tintý kezinde balalardy sheshinýge májbúrlegen

LONDON. QazAqparat – Brıtan polıtsııasy tintý kezinde 8 jasar balalardy sheshinýge májbúrleıdi, al qara násildilerge qatarlastaryna qaraǵanda 6 ese kóp tintý júrgiziledi. Bul týraly Ulybrıtanııanyń balalar ombýdsmeni Reıchel de Soýzanyń baıandamasynda jazylǵan, dep habarlaıdy QazAqparattyń menshikti tilshisi.

Balalar quqyǵy boıynsha ókiletti keńse 2018-2022 jyldary Anglııa men Ýelste 8-17 jas aralyǵyndaǵy 2847 balany tolyq sheshindirip tintý júrgizilgenin anyqtady.

Olardyń keıbirin polıtseıler polıtsııa fýrgony, mektep pen qoǵamdyq oryndarda sheshinýge májbúrlegen.

«Men Anglııa men Ýelste polıtsııa óziniń ustaý jáne tintý ókilettigin paıdalanyp, balalardy sheshindirip tintýine qatysty buryn-sońdy jarııalanbaǵan taldaýdy jarııalaımyn. Taldaý bul Londonǵa ǵana qatysty shektelgen másele emes ekenin kórsetti. Jalpy Anglııa men Ýels boıynsha polıtsııa ustaý jáne tintý aıasynda balalardy sheshindirip tintý jasaıdy, mundaı tájirıbe qatty alańdatatynyna dálelder de bar», - dedi Reıchel de Soýza.

Tolyq sheshindirip júrgizilgen tintýdiń 52%-y eresekterdiń qatysýynsyz júrgizilgeni anyqtaldy.

«Meniń qorytyndymda zańmen bekitilgen balalardy qorǵaý kepili saqtalmaıtynyna, onyń ishinde mektep, polıtsııa kóligi men jurttyń kózinshe tintý men sheshindirip tintýdiń jartysynan kóbi eresekterdiń qatysýynsyz ótetinine dálelder bar», - dep tolyqtyrdy brıtandyq balalar ombýdsmeni.

Qara násildi balalarǵa qatarlastaryna qaraǵanda alty ese kóp tintý júrgiziletini de alańdarlyq jaǵdaı. Tolyq sheshindirip, tintý jasalǵan eń kishkentaı bala segiz jasta bolǵan.

Keıingi kezderi brıtandyq quqyq qorǵaýshylarǵa qatysty aıyptaýlar jıilep ketti.

Ótken aptada Lordtar palatasynyń múshesi Lýıza Keısı astanalyq polıtsııa qyzmetiniń áreket standarttary men ishki mádenıetine qatysty sholý jasady.

Ol London tártip saqshylary arasynda násilshildik, seksızm men áıeldi jek kórý keń taraǵanyn kórsetti.

Buǵan deıin Anglııa men Ýelste 1,3 myńnan asa polıtseı kúdikti ekeni belgili boldy.