Brıtan parlamentinde Ortalyq Azııamen yntymaqtastyq talqylandy
Kezdesýdi eń yqpaldy parlamenttik birlestikterdiń biri – Parlamentaralyq odaǵynyń Brıtandyq toby (POBT) uıymdastyrdy. Pikiralmasýdyń moderatory brıtan Parlamentiniń Qaýymdar palatasynyń múshesi jáne POBT qazynashysy Aleks Sobel boldy.
Kezdesýge brıtan Parlamentiniń 20-ǵa jýyq múshesi, onyń ishinde Qazaqstanmen yntymaqtastyq jónindegi jalpypartııalyq parlamenttik tobynyń tóraǵasy Bob Stıýart, sondaı-aq Qurama Koroldikte akkredıttelgen Ortalyq Azııa elderiniń elshileri qatysty.
Qazaqstan Elshisi Erlan Ydyrysov bıylǵy jyl Qazaqstan Respýblıkasy men basqa da Ortalyq Azııa elderi Táýelsizdiginiń 30 jyldyǵy ekendigin atap ótti. Otandyq dıplomattyń aıtýynsha, osy jyldar ishinde elimiz ózin álemdik qoǵamdastyqtyń senimdi seriktesi retinde kórsete bildi. Ol sondaı-aq Qazaqstanda júrgizilip jatqan, eldiń saıası ınstıtýttaryn odan ári demokratııalandyrýǵa jáne damytýǵa baǵyttalǵan saıası reformalar memlekettiń udaıy evolıýtsııalyq damýy baǵytynyń jalǵasy ekendigin atap ótti.
Ekonomıkalyq reformalar týraly aıta kele, E.Ydyrysov el úshin basymdyq resýrsqa táýeldilikten arylý maqsatynda ekonomıkany odan ári ártaraptandyrý bolyp tabylatynyn atap ótti. Bul turǵyda aýmaǵynda brıtandyq quqyq normalary qoldanylatyn «Astana» halyqaralyq qarjy ortalyǵy – Qazaqstan aýmaǵynda tanylǵan halyqaralyq qarjy jáne saýda habyn damytý úshin strategııalyq qural, sondaı-aq «Beldeý jáne jol» bastamasyn qosa alǵanda, jańa ınvestıtsııalyq jobalardy iske asyrý úshin mańyzdy demeý.
Parlamentaralyq odaǵynyń Brıtandyq toby 1889 jyly qurylǵan. Top mıssııasy – Ulybrıtanııanyń halyqaralyq qatynastaryn keńeıtýge, saýda men turaqty ekonomıkalyq damýǵa, beıbitshilik pen qaýipsizdikti saqtaýdyń tıimdi jahandyq tetikterine parlamenttik qoldaý kórsetýge baǵyttalǵan. Toptyń quramyna Ulybrıtanııanyń barlyq saıası partııalaryn ókildik etetin Qaýymdar palatasy men Lordtar palatasynyń depýtattary kiredi.
