Brıtan parlamentinde Abaı murasy talqylandy
Onlaın-kezdesýdiń qatysýshylary Abaı shyǵarmalarynyń Batys pen Shyǵys mádenıetteri arasynda rýhanı kópir bola bilgendigin jáne áli kúnge deıin ózekti ekendigin atap ótti.
Sharaǵa Brıtan parlamenti Qaýymdar palatasynyń depýtattary, sondaı-aq Ulybrıtanııanyń Tsıfrlandyrý, mádenıet, buqaralyq aqparat quraldary jáne sport máseleleri boıynsha memlekettik mınıstri Djon Ýıttıngdeıl qatysty. Elimizdiń atynan Qazaqstan Respýblıkasynyń Mádenıet jáne sport mınıstri Aqtoty Raıymqulova jáne Qazaqstannyń Ulybrıtanııadaǵy elshisi Erlan Ydyrysov sóz sóıledi.
Lordtar palatasynyń múshesi jáne «Konservatıvtik partııadaǵy Eýrazııa dostary» uıymynyń Prezıdenti lord Pıter Lıllı Abaı da Shekspır sııaqty óz zamanynyń qaıtalanbas tulǵasy bola bilgendigin jáne shyǵarmalary ózektiligin joǵaltpaǵandynyn tilge tıek etti. «Abaı eńbekterimen tanysyp, erekshe áser aldym. Onyń tikeleı qazaqshadan aǵylshynshaǵa jańasha aýdarylǵan shyǵarmalar jınaǵy maǵan qatty unady. Tárjimashylardy bul jetistigimen quttyqtaımyn. «Óldi deýge bola ma aıtyńdarshy, ólmeıtuǵyn artynda iz qaldyrǵan» degen óleń joldary bar shyǵarmaǵa tánti boldym. Bul sózder Abaıdyń ózine de arnalǵan sııaqty», dedi ol.
Qazaqstan Respýblıkasynyń Mádenıet jáne sport mınıstri Aqtoty Raıymqulova: «Uly aqynnyń 175-jyldyq mereıtoıynyń halyqaralyq masshtabta ótkizýdegi eń mańyzdy mindetterdiń biri Abaı shyǵarmashylyǵyn álem halqyna nasıhattaý. Osyǵan oraı mereıtoı qarsańynda Abaıdyń óleńderi men qarasózderi 10 shet tilderine, sonyń ishinde frantsýz, aǵylshyn, arab, ıspan, qytaı, japon, nemis, ıtalııa, túrik, orys tilderine aýdarylyp, aýdarylǵan elder tilinde taratý josparlanyp otyr», dep túıindedi óz sózin.
Kezdesý tek mádenı ǵana emes, eki el arasyndaǵy kommertsııalyq baılanystardy nyǵaıtý taqyrybyn da qamtydy. Ulybrıtanııanyń bıznes, energetıka jáne ónerkásip strategııasy máseleleri boıynsha memlekettik mınıstri Pol Skallı Qazaqstannyń Birikken Koroldik úshin saýda-ınvestıtsııalyq salalar boıynsha mańyzdy saýda áriptesi bolyp qala beretinin atap ótti.
