Brıtan mýzykanty Ed Shıran 30 jasqa deıingi eń baı ánshi atandy
LONDON. QazAqparat – Ulybrıtanııalyq tanymal ánshi Ed Shıran uzaq jyldardan beri hıtmeıker jáne halyqaralyq gastrolderge jıi shyǵýynyń arqasynda eldegi 30 jasqa deıingi eń baı ánshi atandy. Ol ekinshi jyl qatarynan osy ataqty jeńip alyp otyr. Bıyl onyń baılyǵyna 40 mıllıon fýnt-sterlıng qosylǵan, dep habarlaıdy QazAqparat Standard.co.uk jańalyqtaryna silteme jasap.
Álemdik hıt - Shape of You áni oryndaýshysynyń dáýleti 200 mıllıon fýnt-sterlıng dep baǵalanyp otyr. Onyń ótken jyldyń tamyzynda aıaqtalǵan Divide atty týry óte tabysty boldy. Brıtan mýzykanty jastar arasyndaǵy eń baı ánshiler arasynda úzdik bolǵanymen, naǵyz dáýlettiler qataryna qosylý úshin kóp ter tógýi kerek. «Sunday Times Rich List» reıtınginde Ed Shıran 10-orynda tur. Al ser Endrıý Lloıd-Ýebber men ser Pol Makkartnı 800 mln fýnt-sterlıngpen tizimniń basyna jaıǵasqan.
Ótken jyly Pollstar Ed Shırannyń 260 halyqaralyq shoýy oǵan 775,5 mln dollar tabys ákelgenin, sóıtip jańadan rekord ornatqanyn málimdegen edi.
Aıta keteıik, Ed Shıran mol dáýletin úlken jaýapkershilikpen, saýatty jumsaıdy. Ol qarajatty Ulybrıtanııa boıynsha jyljymaly múlikke ınvestıtsııa retinde salǵan.
Al elge taıaýda qonys aýdarǵan Rıanna Sunday Times reıtıngi boıynsha Ulybrıtanııadaǵy eń baı mýzykant áıel atandy.
