Brıtan qutqarýshysy La-Mansh arqyly júzip bara jatyp joǵalyp ketti

LONDON. QazAqparat – 42 jastaǵy brıtandyq qutqarýshy Ien Hıýz La-Mansh arqyly jalǵyz júzip ótý kezinde iz-túzsiz joǵalyp ketti, dep habarlaıdy QazAqparat BBC agenttigine silteme jasap.

Ien Hıýz júzýdi 20 maýsym, seısenbi kúni ilespe qaıyqtaǵy qoldaý tobymen birge bastady.

Áskerı-teńiz flotynyń áskerı tikushaqtarymen jáne patrýldik katermen izdeý esh nátıje bermedi.

Eki apta buryn Ien áleýmettik jelilerge aýa raıynyń qolaısyzdyǵyna baılanysty júzý ýaqyty ózgertilgeni týraly post jarııalaǵan bolatyn.

«La-Mansh buǵazyn qaıyrymdylyq maqsatynda júzip ótpek bolǵan qutqarýshylarymyzdyń biri Ien Hıýz iz-túzsiz joǵalyp ketkenin qaıǵyra rastaımyz», - delingen Ýest-Mıdlendstiń órt sóndirý qyzmeti taratqan baspasóz habarynda.

Eki balanyń ákesi Ien Hıýz órt sóndirý qyzmetinde 19 jasynan beri jumys isteıdi. Qazirgi ýaqytta ol tehnıkalyq qutqarý bólimshesiniń qyzmetkeri.

«Frantsýz jáne Belgııa áskerı tikushaqtary, áskerı-teńiz floty men polıtsııanyń patrýldik katerlerimen izdep jatqanymyzben Ienniń qaıda ekeni áli belgisiz», - delingen órt sóndirý qyzmetiniń málimdemesinde.

La-Mansh eniniń eń tar jeri - 34 shaqyrym. Ony júzip ótýge 7 saǵattan 27 saǵatqa deıin ýaqyt ketedi.

Osy júzý arqyly Ien Hıýz Brıtan júrek qoryna, Mıdlendstiń Sanıtarııa avıatsııasy men Órt sóndirý qyzmetine £21,000 jınaýdy josparlaǵan.

Ien Hıýzdiń joǵalyp ketkeni týraly aqparat aımaqtyq jedel baqylaý jáne qutqarý ortalyǵyna (CROSS) seısenbi, 20 maýsymda tústi.

Ortalyq izdeýge Frantsııa men Belgııanyń Áskerı teńiz kúshteri men Frantsııanyń teńiz patrýlin jiberdi.