Brıtan ınjenerleri dron «aýlaıtyn» qarý jasap shyqty

ASTANA. QazAqparat - Brıtandyq kompanııa Openworks Engineering zań buzǵan drondardy aýlaıtyn pnevma zeńbirek jasap shyqty. Qurylǵy parashıýty bar aý atady jáne drondy búldirmeı jerge túsiredi.

Shaǵyn SkyWall 100 qarýy granata atqyshqa uqsaıdy, salmaǵy 10 keli. Onyń zııatker nysandy taný jáne ustaý júıesi nysanaǵa deıingi ara qashyqtyqty jáne oǵan oqty jetkizý jyldamdyǵyn anyqtaıdy, ári operatorǵa shúrippe basar utymdy sátti ózi usynady.

SkyWall 100 syǵylǵan aýamen atylady, oǵan tórt túrli oq qoldanylady. Oqý-jattyǵýǵa arnalǵan, aýy bary, aýmenen qatar parashıýty bary, sondaı-aq elektromagnıtti tolqyn jiberetin snarıadtarmen atylady. Qarýdy jasaýshylardyń aıtýyna qaraǵanda, ol mınýtyna 7 ret oqtalady.

Osylaısha SkyWall 100 qarýyna birneshe pılotsyz basqarylatyn apparatpen kúresýge múmkinshiligi bar.

Ony jasaýshylar, qarý eń aldymen polıtsııaǵa kómektesedi dep otyr. Óıtkeni tártip saqshylary drondy joımaı «ustaýyna» onyń tirkeý nómirin anyqtaýyna bolady. Qurylǵy armııaǵa, shekarashylarǵa, jeke kuzet mekemelerine de arnalǵan.

Qazirgi ýaqytta qashyqtan basqarylatyn drondardy esirtki satýshylar, ónerkásiptik tyńshylar, ataqty adamdardyń jeke ómirine qol suǵýshylar, sondaı-aq lańkester paıdalanýda.

Drondardyń tártip buzýyna qarsy ár memleket ózinshe kúresýde. Aıtalyq, Japonııada oǵan qarsy aýmen qarýlanǵan pılotsyz apparat jiberiledi, Gollandııada arnaıy úıretilgen búrkitter qoldanylady, al Germanııada drondarǵa qarsy lazerler paıdalanylady.