Brıtan ǵalymdary qan taldaýy arqyly qaterli isikti anyqtaýdyń jańa ádisin oılap tapty

ASTANA. QazAqparat – Brıtan jáne amerıkalyq bir top ǵalym qan taldaýy arqyly qaterli isik dıagnostıkasy ádisiniń synaǵy jaqsy nátıje kórsetkenin málimdedi, dep habarlaıdy QazAqparat VVS aqparat agenttigine silteme jasap.

Jańa zertteý 2020 jyldyń kókteminde jarııalandy.

Ǵalymdar qarapaıym qan taldaýy arqyly onkologııalyq aýrýlardyń 50-den astam túrli belgileri paıda bolǵanǵa deıin olardy erte satyda anyqtaýdy oılastyryp otyr.

Aýqymdy synaq 2021 jyly Ulybrıtanııa men AQSh-ta bastaldy.

«Galereıa» dep atalatyn test mehanızmi genetıkalyq kod, ıaǵnı DNQ-da isikten qanǵa túsetin hımııalyq ózgeristerdiń belgilerin izdeıdi.

Ǵalymdar ádisteme boıynsha jumys ázirge aıaqtalmaǵanyn, biraq synaqtyń birinshi kezeńinen keıin aýyr dertten qutylǵan naýqastar sany artady dep aıtýǵa bolatynyn atap ótti.

Synaq ásirese bas jáne moıyn, ishek, ókpe, uıqy bezi jáne tamaqtaǵy qaterli isikti anyqtaýda tıimdi.

Ulybrıtanııanyń NHS densaýlyq saqtaý júıesi ádisti 2024-2025 jyldary taǵy bir mıllıon adamǵa synap kórýdi josparlap otyr.

«Qaterli isikti erte anyqtaý óte mańyzdy. Bul synaq bizge qaterli isik aýrýlaryn erterek anyqtaýǵa jáne myńdaǵan adamnyń ómirin saqtap qalýǵa kómektesedi», - deıdi NHS onkologııa departamentiniń basshysy, professor Pıter Djonson.

Ádisti ázirlep, zerttegen - Dana-Farber onkologııa ınstıtýty men Garvard medıtsına mektebiniń amerıkalyq ǵalymdar toby jáne Frensıs Krık ınstıtýty, London ýnıversıtettik kolledjiniń ǵalymdary.

Zertteý nátıjesi Oksford ýnıversıtetiniń Annals of Oncology akademııalyq jýrnalynda jarııalanǵan.

Jobany Kremnıı alqabyndaǵy startap Grail qarjylandyryp jatyr, onyń ınvestorlary arasynda Amazon negizin qalaýshy Djeff Bezos bar.