Brıtan flotynyń jalǵyz muzjarǵysh kemesi taǵy jóndeýge jiberildi
ASTANA. KAZINFORM — Brıtanııanyń «Protektor» muzjarǵyshynda taǵy bir aqaý tabylyp, Devonport áskerı-teńiz bazasyna súıretilip jetkizildi. Onyń taǵdyry tekserý nátıjeleri men jóndeýdiń qunyna baılanysty bolmaq, dep habarlaıdy Kazinform agenttiginiń Londondaǵy tilshisi.
«Protektor» — Brıtan áskerı-teńiz flotyndaǵy jalǵyz mamandandyrylǵan muzjarǵysh. Keme Arktıka men Antarktıdadaǵy operatsııalarǵa, sondaı-aq patrýldeý, ǵylymı zertteýler jáne balyq sharýashylyǵyn baqylaý maqsatynda paıdalanylady.
Navy Lookout basylymy keme qazirgi ýaqytta Devonport bazasynda ekenin jazdy. Mamandar aqaýdyń sebebin anyqtaý jáne kemeniń jaǵdaıyn baǵalaý jumystaryn júrgizý ústinde. Eger jóndeý jumystary tym qymbatqa tússe, keme paıdalanýdan shyǵarylýy da múmkin.
Keme 2001 jyly azamattyq zertteýler úshin jasalǵan, biraq 2011 jyly ony áskerı-teńiz floty jalǵa alǵan. Áskerıler bastapqyda kemeni jalǵa alyp, sodan keıin shamamen 54 mıllıon fýnt sterlıngke satyp aldy.
Kemede kúrdeli tehnıkalyq aqaýlar buǵan deıin de bolǵan. 2019 jyly Karıb teńizinde qozǵaltqyshy isten shyqty, artynsha toǵyz aı boıy qomaqty qarajatqa jóndeldi. 2025 jyly keme qurǵaq dokta jeti aı turdy, endi bıyl taǵy da jóndeý qajet bolyp otyr.
«Protektor» kemesin paıdalanýdan shyǵarý brıtan flotyna kóp másele týyndatady, óıtkeni jalǵyz arnaıy muzjarǵyshtyń tez ornyn basý qıynǵa soǵatyny anyq. Ekinshi muzjarǵysh «Ser Devıd Attenboro» negizinen ǵylymı jáne jabdyqtaý mıssııalaryn oryndaıdy jáne áskerı-teńiz kemesiniń ornyn basa almaıdy.
Ulybrıtanııanyń Qorǵanys mınıstrligi buryn «Protektor» kemesin jańa kememen aýystyrý josparlaryn jarııalaǵan. Ondaı keme Arktıkada da, Antarktıdada da jumys isteı alýy qajet. Degenmen, mundaı kemeniń qashan tabylatyny belgisiz.
Endi brıtan bıligi 25 jyldyq eskirgen kemege ınvestıtsııa salýdy jalǵastyrý kerek pe, álde ornyna basqa keme tabý kerek pe — osy máseleni sony sheshýi kerek. Ýaqytsha basqa muzjarǵyshty jalǵa alý jospary da joq emes.
Eske sala keteıik, AQSh prezıdenti Donald Tramp Soltústik teńizde munaı óndirilmese, Ulybrıtanııa bankrot bolýy múmkin degen oıdy alǵa tartqan bolatyn.
