Brıtan ánshisi Krıs Rı 74 jasynda qaıtys boldy

ASTANA. KAZINFORM — Brıtandyq rok jáne blıýz oryndaýshysy Krıs Rı (Chris Rea) 74 jasynda ómirden ótti. Ol «The Road To Hell» jáne Rojdestvo merekesinde keńinen tanymal «Driving Home For Christmas» ánderimen álemge tanylǵan, dep habarlaıdy Euronews.

Mýzykanttyń jary men eki balasynyń atynan jasalǵan málimdemede Krıs Rıdiń syrqattan keıin aýrýhanada, otbasynyń janynda kóz jumǵany aıtyldy. Ol Rojdestvo merekesine úsh kún qalǵanda qaıtys bolǵan.

Krıs Rıge buryn uıqybez obyry dıagnozy qoıylyp, 2001 jyly oǵan ota jasalǵan. Al 2016 jyly ınsýlt alǵan.

Ánshi 1951 jyly Ulybrıtanııanyń Mıdlsbro qalasynda dúnıege kelgen. Ol 1970–1980 jyldary «Fool (If You Think It’s Over)», «Let’s Dance» jáne «The Road To Hell» sııaqty hıtterimen keńinen tanyldy. Al 1988 jyly shyqqan «New Light Through Old Windows» jınaq albomyna engen «Driving Home For Christmas» áni onyń eń áıgili týyndylarynyń birine aınaldy.

Bul kompozıtsııa úıine qaıtyp kele jatqan sharshaǵan jolaýshynyń áserin sýrettep, jylýlyq pen merekelik kóńil kúıdi jetkizetin án retinde baǵalanady.

Krıs Rı shyǵarmashylyq jolynda 25-ten astam stýdııalyq albom shyǵarǵan. Onyń «The Road To Hell» (1989) jáne «Auberge» (1991) albomdary Ulybrıtanııanyń mýzykalyq charttaryn bastap turǵan.

Buǵan deıin «Krımınaldyq chtıvo» fılminiń akteri Pıter Grın qaıtys bolǵanyn jazǵan edik.