Brıstolde janarmaı beketinde belgisiz bireý adamdardy kepilge aldy

BRISTOLЬ. QazAqparat – Anglııanyń Brıstol qalasyndaǵy janarmaı beketinde qolynda pyshaǵy bar belgisiz bireý adamdardy kepilge aldy, dep habarlaıdy QazAqparat Independent basylymyna silteme jasap.

Beısenbi kúni saǵat 7:30-den óte Hengrov-Ýeıdegi Esso janarmaı beketinde bolǵan oqıǵa ornyna qarýlanǵan polıtsııa men qylmyskermen tildesýshi maman shaqyryldy.

Polıtsııanyń habarlaýynsha, úsh saǵattan keıin er adam ustalǵan.

Janarmaı beketiniń qyzmetkerleri zardap shekpegen, olar qaýipsiz jerge jasyrynyp qalǵan.

Jeńil jaraqat alǵan bir adam aýrýhanaǵa jetkizildi. Kýágerler kúdiktini kisenmen alyp keter aldynda garajdan qatty dybystar estip, jarqyl kórgenderin aıtqan.

Eıvon men Somerset polıtsııasynyń málimdemesinde bylaı delingen:

«Búgin tańerteń biz Hengrov-Ýeıdegi janarmaı beketindegi oqıǵaǵa baılanysty er adamdy ustadyq. Tergeý júrip jatyr».