Brısben týrnıri: Elena Rybakına azýly qarsylasyn oısyrata utty

Qazaqstannyń birinshi, álemniń 4-raketkasy Elena Rybakına Brısben (Aýstralııa) WTA 500 týrnıriniń shırek fınalyna shyqty, dep habarlaıdy Kazinform.

Jarystyń 2-raketkasy bolyp tirkelgen qazaqstandyq tennısshi úshinshi aınalymda álemniń 30-raketkasy, belgııalyq Elıze Mertenspen sheberlik baıqasty.

Osyǵan deıin qarsylastar ózara tórt márte kezdesse, sonyń úsheýinde Elena jeńiske jetken edi.

E.Mertens ońaı shaǵylatyn jańǵaq emes, sporttyq jolynda úsh ret juptyq synda «Úlken dýlyǵa» týrnıriniń jeńimpazy atanǵan tájirıbeli tennısshi bolatyn.

Bul joly birinshi partııada qos breık jasaǵan E.Rybakına aıqyn basymdyq tanytty — 6:1.

Qazaqstandyq sportshy ekinshi setti de breıkpen bastady — 2:0. Taǵy bir breık — 3:0. Aqyry match núktesin ózi dop bergende qoıdy — 6:0.

Bir saǵatqa jetpeıtin ýaqyt ishinde Elena 3 eıs jasap, 15 breık-poınttyń beseýin óz esebine jazdy. E.Mertens 3 eıspen shekteldi.

Elena Rybakına dodanyń jartylaı fınalyna shyǵý úshin reseılikter, álemniń 16-raketkasy Veronıka Kýdermetova nemese reıtıngte 28-satydaǵy Anastasııa Potapovanyń bireýimen talasady.

Eske sala keteıik, budan buryn Elena Rybakınanyń jyldyń alǵashqy jarysyn jeńispen bastaǵanyn jazǵan bolatynbyz.

Sondaı-aq Ámir Omarhanov álemdegi úzdik tennısshilerdiń tizimine endi.