Biryńǵaı zeınetaqy qorynda qansha jınaq bar
ASTANA. KAZINFORM – Biryńǵaı jınaqtaýshy zeınetaqy qorynyń byltyrǵy taza ınvestıtsııalyq kirisi 3,36 trln teńgeden asty. Tolyǵyraq qordyń resmı saýalǵa jaýabynda aıtylǵan.
– 2025 jyldyń 1 qańtardaǵy esep boıynsha Biryńǵaı jınaqtaýshy zeınetaqy qoryndaǵy salymshylardyń jeke zeınetaqy shotynyń sany 12,50 mln asty. Onyń ishinde 11,15 mln astamy mindetti zeınetaqy jarnasyna arnalǵan shot, shamamen 715,52 myńy mindetti kásiptik zeınetaqy jarnasy shoty jáne 439,58 myńy erikti zeınetaqy jarnasy shoty ashylǵan, - delingen saýal jaýabynda.
Aıta ketsek, byltyrdan bastap elimizde jumys berýshiler jumysshyǵa zeınetaqy jarnasyn tóleýge mindetteldi. Bul baǵytta qordaǵy zeınetaqy shottarynyń sany 4,67 mln asqan.
- Salymshylardyń jeke jáne shartty shottaryna byltyr túsken zeınetaqy jarnalarynyń mólsheri 2,79 trln teńgege jýyq. Bul - 2023 jylmen salystyrǵanda 29% artyq, - dep habarlaıdy qordan.
Biryńǵaı jınaqtaýshy zeınetaqy qoryndaǵy barlyq jarna oń sıpatqa ıe:
- Jeke zeınetaqy shottaryna byltyr jyl boıy 2,44 trln teńgeden astam jarna tústi (2023 jylmen salystyrǵanda 18,3% artyq);
- Mindetti kásiptik zeınetaqy jarnasy 113,6 mlrd teńge (ósim 18,9%);
- Erikti zeınetaqy jarnasy 3,07 mlrd teńge (ósim 32,50%) jınaldy;
- Jumys berýshiler jumysshyǵa zeınetaqy jarnasy shamamen 231,24 mlrd teńge.
- 2025 jylǵy 1 qańtardaǵy jaǵdaı boıynsha Biryńǵaı jınaqtaýshy zeınetaqy qoryndaǵy zeınetaqy jınaqtarynyń kólemi shamamen 22,80 trln teńgege jetti. Sonymen qatar byltyr ınvestıtsııalyq kiris 3,36 trln teńgeden asty. Onyń kólemi 2023 jylmen salystyrǵanda 1,79 trln teńgege (114,5%) artyq, - delingen resmı habarlamada.
Buǵan deıin Biryńǵaı jınaqtaýshy zeınetaqy qory «Nurbank» AQ sotqa berip 120,4 mln teńge dıvıdend óndirip alǵany týraly habarlaǵan edik.
Aıta ketsek, Memleket basshysy Qasym-Jomart Toqaev bıyl Úkimettiń keńeıtilgen otyrysynda Qor qarjysyn strategııalyq jobalarǵa tartý týraly da pikir bildirgen edi.
Sondaı-aq agenttik tilshisi memleket Biryńǵaı jınaqtaýshy zeınetaqy qoryndaǵy qazaqstandyqtardyń aqshasyn Ulttyq bank arqyly qalaı basqaryp otyrǵanyna sholý jasady.
Odan bólek Qarjy naryǵyn retteý jáne damytý agenttiginiń ókili BJZQ-daǵy aqshasy azaıyp qalǵanyna shaǵymdanǵan salymshylarǵa keńes berdi.