Biryńǵaı ýaqyt beldeýiniń adamǵa áserin zertteý algorıtmi qandaı
ASTANA. KAZINFORM – Saǵat tilin artqa jyljytý adamǵa qalaı áser etedi? Osy máseleniń zertteletini málim. Ǵylym jáne joǵary bilim mınıstrligi zertteý algorıtmin túsindirdi.
«Ǵylym jáne tehnologııalyq saıasat týraly» Zańnyń 37-babyna sáıkes, baǵdarlamalyq-maqsatty qarjylandyrý strategııalyq ǵylymı zertteýler júrgizýge bólinedi jáne ol konkýrs negizinde júzege asyrylady. «Ǵylymı nemese ǵylymı-tehnıkalyq qyzmetti qarjylandyrý, ǵylymı uıymdardy qarjylandyrý erejeleriniń» 45-tarmaǵyna sáıkes, baǵdarlamalyq-maqsatty qarjylandyrý aıasynda ǵylymı-tehnıkalyq tapsyrmalar quzyretti memlekettik organ nemese salalyq quzyretti organ tarapynan ǵalymdar, ǴǴK músheleri, ǵylym salasyndaǵy mamandar, memlekettik organ ókilderi, salalyq memlekettik organdar ókilderinen quralǵan jumys toby tarapynan ázirlenedi. 2025-2027 jyldarǵa arnalǵan baǵdarlamalyq-maqsatty qarjylandyrý konkýrsy boıynsha ǵylymı-tehnıkalyq tapsyrmalar boıynsha Ǵylym komıteti jumys tobyn qurdy. Onyń quramyna ártúrli salalar men salalyq memlekettik organdar ókilderi, sonyń ishinde «Ómir jáne densaýlyq ǵylymy» basymdyǵy boıynsha QR Densaýlyq saqtaý mınıstrligi ókilderi kirdi», - delingen Ǵylym mınıstrliginiń Kazinform agenttigine bergen jaýabynda.
Vedomstvo málimetinshe, Densaýlyq saqtaý mınıstrligi strategııalyq memlekettik mindetterdi sheshýge baǵyttalǵan ǵylymı-tehnıkalyq tapsyrmalardy usyndy, onyń ishinde ýaqytty aýystyrý máselesi de qarastyrylǵan. DSM usynǵan málimetterge sáıkes, ýaqyt beldeýine qatysty birneshe óńir turǵyndarynan kóp shaǵym túsken.
«Osyǵan baılanysty DSM ýaqytty birizdendirýge baılanysty psıhıkalyq jáne fızıkalyq densaýlyqqa áserin zertteý úshin derekter bazasyn ǵylymı negizdeý maqsatynda ǵylymı-tehnıkalyq tapsyrma ázirlep, joldady. Bul ǵylymı zertteýdiń salalyq memlekettik organ úshin mańyzdylyǵyn eskere otyryp, usynystar jumys tobymen qaralyp, túzetildi jáne QR Úkimetiniń Joǵary ǵylymı-tehnıkalyq komıssııasynyń (JǴTK) qaraýyna usynylyp, 2025-2027 jyldarǵa arnalǵan «Ómir jáne densaýlyq ǵylymy» basymdyǵy boıynsha maquldandy. Aıta ketý kerek, JǴTK quramynda QR Densaýlyq saqtaý mınıstri bar jáne bul másele atalǵan memlekettik organ tarapynan qoldaý tapty. Óz kezeginde QR Ǵylym jáne joǵary bilim mınıstrligi JǴTK maquldaǵan ǵylymı-tehnıkalyq tapsyrmalar boıynsha konkýrs qujattamasyn ázirlep, bekitedi ári 2025-2027 jyldarǵa arnalǵan baǵdarlamalyq-maqsatty qarjylandyrý boıynsha konkýrs jarııalaıdy. Bul is-sharalar respýblıkalyq bıýdjet komıssııasynyń sheshimimen bekitilgen qarajat aıasynda júzege asyrylady», - dep kórsetilgen mınıstrlik aqparatynda.
Konkýrsqa ǵylymı-tehnıkalyq qyzmetti júzege asyratyn akkredıttelgen sýbektiler, sondaı-aq bilim berý salasyndaǵy avtonomdy uıymdar qatysa alady. Konkýrsqa ótinim bergende, ótinim berýshi zertteýdiń iske asyrý kezeńi men qarjylandyrý somasyn konkýrs qujattamasy talaptaryna sáıkes óz betinshe anyqtaıdy.
- Osyǵan qosa, qarjylandyrý erejeleriniń 42-tarmaǵyna sáıkes, ǵylymı jáne ǵylymı-tehnıkalyq jobalardyń júzege asyrylý kezeńi aıaqtalǵannan keıin, Ulttyq ǵylymı-tehnıkalyq saraptama ortalyǵy óz saıtynda jobalar týraly aqparatty jarııalaıdy, bul 30 kúntizbelik kún ishinde júzege asyrylady, - dep túsindirdi mınıstrlik ókilderi.
Budan buryn habarlanǵandaı, bıyl qarasha aıynda Qazaqstanda biryńǵaı ýaqyt beldeýiniń adamdarǵa áseri zertteletini málim boldy.
Ýaqyt beldeýin zertteýge shamamen 160 mln teńge jumsalmaq.
Jaqynda, AMANAT músheleri ýaqyt beldeýine qatysty zertteýdi naýryzǵa deıin aıaqtaýdy usyndy.
Premer-mınıstrdiń orynbasary Serik Jumanǵarın biryńǵaı ýaqyt beldeýiniń adamdarǵa áserin zertteý máselesine qatysty pikir aıtty.