AMANAT-ta biryńǵaı ýaqyt beldeýi týraly Úkimettiń zertteý qorytyndysy qaraldy

ASTANA. KAZINFORM - Májilistegi «AMANAT» fraktsııasynyń músheleri ózgergen ýaqyt beldeýiniń halyqtyń fızıkalyq jáne psıhıkalyq densaýlyǵyna, eńbek ónimdiligine jáne energetıkalyq resýrstardy tutynýǵa áseri týraly zertteý nátıjeleri boıynsha Úkimet esebin tyńdady.

Bul zertteý jumysy «AMANAT» Fraktsııasynyń usynymyn iske asyrý sheńberinde 6 baǵyt boıynsha júrgizildi. Bedeldi ǵalymdar men sarapshylar, ǵylymı ınstıtýttar tartyldy. Zertteý barysynda geografııalyq parametrleri uqsas ár túrli memlekettiń tájirıbesi nazarǵa alyndy.

Depýtattar aldynda Premer-Mınıstrdiń orynbasary Ermek Kósherbaev sóz sóıledi.

– Salystyrmaly taldaý jumysy Eýropadaǵy kóptegen damyǵan elderde Qazaqstanǵa uqsas tań atý jáne kún batý merzimi bar ekenin kórsetti. Atalǵan memleketter osyndaı jaǵdaıda belsendi damyp keledi. Adamı kapıtaldy damytý boıynsha da joǵary kórsetkishterge ıe. Osyǵan baılanysty Úkimet biryńǵaı ýaqyt beldeýin engizý týraly sheshimdi qoldaı otyryp, ony tolyq negizdelgen dep sanaıdy, – dedi vıtse-premer.

Sondaı-aq ol zertteý nátıjeleri biryńǵaı ýaqyt beldeýine kóshý eldegi bilim berý protsesiniń nátıjelerine teris áser etpegenin, sondaı-aq JKO men kóshedegi qylmys jaǵdaıyna aıtarlyqtaı áserin tıgizbegenin rastady.

Sonymen qatar búginde Shyǵys Qazaqstan oblysynyń jeti aýdanynda jumys kestesine túzetý engizildi. Bul bastama jergilikti turǵyndar tarapynan keń qoldaý tapty.

Halyq qalaýlylarynyń suraqtaryna Saýda jáne ıntegratsııa mınıstri Arman Shaqqalıev, Ǵylym jáne joǵary bilim mınıstri Saıasat Nurbek jáne Úkimettiń ózge de ókilderi jaýap berdi.

A. Shaqqalıevtiń aıtýynsha, aldyn ala derekter halyq ómiriniń negizgi kórsetkishine jáne ekonomıkanyń negizgi salalarynyń jumys isteýine ózgergen ýaqyt beldeýiniń tıgizgen teris áserin anyqtaǵan joq.

Densaýlyq saqtaý birinshi vıtse-mınıstri Tımýr Sultanǵazıev biryńǵaı ýaqyt beldeýin engizý qadamy densaýlyq saqtaý salasyna oń ózgeris alyp kelgenin, aýrýlar sanynyń tómendegenin atap ótti. Máselen, jedel járdem shaqyrtý sany 0,4%-ǵa, júrek-qan tamyrlary aýrýlarymen syrqattaný kórsetkishi 3,5%-ǵa, psıhıkalyq jáne minez-qulyq buzylysy 1,6%-ǵa, jaraqattaný kórsetkishi 3,3%-ǵa, qaterli isikter kórsetkishi 1,7%-ǵa tómendegeni baıqaldy. ıAǵnı, ýaqytty utymdy bólý – qoǵamdyq densaýlyqqa oń áserin tıgizýde.

– Memleket basshysy «Ana tili» gazetine bergen suhbatynda Úkimet ýaqyt beldeýin aýystyrýdyń azamattardyń turmysyna jáne el ekonomıkasyna áserin jan-jaqty zertteýi tıis ekenin atap ótti. Búgin Úkimet «AMANAT» fraktsııasynyń depýtattaryna osy ǵylymı zertteýdiń qorytyndysyn tanystyrdy. Ol ǵalymdardyń, sarapshylardyń qatysýymen ótkizilip, Qazaqstanda biryńǵaı ýaqytty engizý týraly sheshimniń ǵylymı negizdiligin kórsetti, – dedi Májilis Spıkeri Erlan Qoshanov.

Talqylaý jumysyn qorytyndylaı kele, depýtattar Úkimettiń ǵylymı-zertteý nátıjesin qabyldady. Depýtattar zertteý qorytyndysyn qalyń buqaraǵa jetkizýdiń mańyzyn atap ótti.

Sonymen qatar, depýtattar Úkimetke jergilikti bılik organdarymen, máslıhattarmen birlesip, elimizdiń biryńǵaı ýaqyt beldeýine kóshýiniń mańyzy men ǵylymı negizi týraly arnaıy túsindirý jumysyn júrgizýdi usyndy. Bul jumysqa ǵalymdardy, sarapshylar tobynyń ókilderin, qoǵamdyq pikir kóshbasshylaryn belsendi tartý kerek. BAQ pen áleýmettik jelilerde tıisti aqparattyq jumys uıymdastyrý qajet.

Sonymen qatar, halyq suranysy men sheteldik tájirıbeni eskere otyryp, jergilikti jerlerde jumys kestesin ózgertý tájirıbesin jalǵastyrý kerek.

Buǵan deıin ýaqyt beldeýin aýystyrýdyń saldary týraly zertteý nege aıaqsyz qalǵanyn jazǵanbyz.