Biryńǵaı saǵat beldeýi tabıǵat yrǵaǵyna oralýǵa múmkindik berdi - maman
ASTANA. KAZINFORM – «Tsırkadtyq yrǵaq» - bul adam densaýlyǵynyń, jumysqa qabilettiliginiń jáne uzaq ómir súrýiniń negizi. Bul týraly Ulttyq qoǵamdyq densaýlyqty saqtaý ortalyǵynyń basqarma tóraǵasynyń orynbasary Saltanat Nazarova aıtty.
«Adamnyń ómirlik protsesteri ýaqytqa (saǵat, kún, apta, aı, maýsym nemese jyl ishinde) baılanysty ózgeredi. Bul ózgerister bıologııalyq yrǵaq dep atalady. «Tsırkadtyq yrǵaq» - bul bizdiń densaýlyǵymyzdyń, jumysqa qabilettiligimizdiń jáne uzaq ómir súrýimizdiń negizi. Kóptegen sheteldik zertteýler bıologııalyq yrǵaq aǵzadaǵy gormondardyń, fermentterdiń jáne basqa belsendi zattardyń deńgeıin basqaratyndyǵyn, sonymen qatar qan quramy men jalpy tepe-teńdikti (gomeostaz) saqtaıtyndyǵyn kórsetedi», - dedi ol.
Onyń atap ótýinshe, uıqy men sergektikti, demalý men belsendilikti, tamaqtaný men zat almasýdy retteıtin bıologııalyq yrǵaqtyq úılesimdi jumysy adam densaýlyǵy úshin mańyzdy ról atqarady.
«Biryńǵaı ýaqyt beldeýi bıologııalyq saǵatty sınhrondaý jáne resmı ýaqyt pen kúndizgi mezgildi múmkindiginshe jaqyndatý arqyly ómirdiń tabıǵı yrǵaǵyna oralýǵa múmkindik berdi. Búgingi tańda álemniń 195 eliniń 117-si standartty saǵat beldeýine barynsha jaqyn geografııalyq ýaqyt paıdasyna tańdaý jasady. Óıtkeni adamnyń «Tsırkadtyq yrǵaǵy» kúndizgi tabıǵı tsıklmen sınhrondaldy», - dedi Saltanat Nazarova.
Eske sala keteıik, 1 naýryzdan bastap Qazaqstanda ýaqyt bir saǵat artqa jyljydy.
Osydan keıin ózgeriske qarsy shyqqan qazaqstandyqtar buryn qoldanysta bolǵan ýaqyt beldeýin qaıtarý jónindegi petıtsııa jarııalady. Standartty ýaqyt beldeýiniń oń áseri týraly negizdelgen halyqaralyq ǵylymı zertteýlerdi jáne ýaqyttyń aýysýy halyqtyń densaýlyǵyna keri áser etkenin rastaıtyn derekterdiń bolmaýy negizinde Saýda jáne ıntegratsııa mınıstrligi petıtsııany qanaǵattandyrýdan bas tartý týraly sheshim qabyldady. Keshe Úkimet otyrysynda Premer-Mınıstr Oljas Bektenov biryńǵaı ýaqyt beldeýine bekerden-beker aýyspaǵanymyzdy atap ótti.
