Biryńǵaı QR júıesi Qazaqstandaǵy tólem naryǵynyń tórtten bir bóligin alyp jatyr — Ulttyq bank
ALMATY. KAZINFORM — Almatyda ótip jatqan Central Asia Fintech Summit samıtinde Ulttyq bank tóraǵasy Tımýr Súleımenov biryńǵaı tólem júıesi týraly aıtty.
Qazaqstandaǵy biryńǵaı QR júıesi naryqtyń 25%-yna jetti. Júıe arqyly 400 mıllıard teńgeden astam somaǵa 20 mıllıonnan astam tranzaktsııa óńdeldi.
Onyń aıtýynsha, bankaralyq mobıldi tólemderdi damytý ulttyq tsıfrlyq qarjy ınfraqurylymyn qalyptastyrý kezeńderiniń biri boldy.
— Bıyl biz 19 shildeden bastap bankaralyq mobıldi tólem júıesin iske qostyq. 400 mıllıard teńgeden astam somaǵa 20 mıllıon tranzaktsııany óńdeldi. Biryńǵaı QR júıesi naryqtyń 25%-yn alyp jatyr, — dedi Tımýr Súleımenov.
Ulttyq bank basshysy júıeni engizýge qatysqan bankter men qarjy sektorynyń mamandaryna alǵys aıtty.
Onyń aıtýynsha, Qazaqstan tsıfrlyq qarjy ınfraqurylymynyń jeke elementterin únemi engizip keledi. Tsıfrlyq teńge 2023 jyly, al Ulttyq alaıaqtyqqa qarsy kúres ortalyǵy 2024 jyly iske qosyldy. Keıinnen bankaralyq tólem quraldary men basqa da tsıfrlyq qyzmetterdi ázirleý jalǵasty.
Súleımenov retteýshilerdiń mindeti tek óz protsesterin tsıfrlandyrý emes, qarjy naryǵynyń odan ári tehnologııalyq damýy úshin jaǵdaı jasaý ekenin atap ótti.
Eske salsaq, Salyq kodeksin engizý jónindegi jobalyq keńseniń 26-otyrysynda QR-tólemder men tsıfrlyq teńgeni damytýǵa jańa sharalar usynylǵan edi.
