Biryńǵaı QR júıesi iske qosylǵannan keıin bankterdiń bonýstary saqtala ma
ASTANA. KAZINFORM – Biryńǵaı QR júıesi iske qosylǵannan keıin de bankterdiń bonýstyq baǵdarlamalary ózgermeıdi. Bul týraly Ulttyq Bank Tólem júıeleri jáne tsıfrlyq qarjy tehnologııalary departamentiniń dırektory Erlan Ashyqbekov aıtty.
Ol biryńǵaı QR júıesi engizilgennen keıin de bankterdiń bonýstyq baǵdarlamalary saqtalatynyn aıtty. Jańa júıe arqyly klıent óz bankiniń qosymshasymen kez kelgen saýda ornynda tólem jasaı alady, bul rette termınaldyń qaı bankke tıesili ekeni mańyzdy bolmaıdy.
– Bankterdiń bonýs júıesine kelsek, ol burynǵydaı saqtalady. Ár bank óziniń bıznes sheshimine qaraı bonýs mólsherin kóbeıtýge, azaıtýǵa nemese júıege ózgeris engizýge quqyly, – dedi spıker.
Sondaı-aq ol tólem kezinde aqsha keshigip túsken nemese qate aýdarylǵan jaǵdaıda klıent óz bankine júginýi qajet ekenin eske saldy.
-Bank máseleni tekserip, qajet bolǵan jaǵdaıda Ulttyq tólem korporatsııasymen jáne tólemge qatysqan basqa banktermen birlesip sheshedi. Klıent úshin qyzmet kórsetý tártibi ózgermeıdi, - dedi departament dırektory.
Eske salaıyq, búginnen bastap bankterdiń basym bóligi biryńǵaı QR júıesin iske qosty.
