Biryńǵaı QR engizilgennen keıin kartamen tólem jasaýǵa bola ma
ASTANA. KAZINFORM - Biryńǵaı QR júıesi iske qosyldy, alaıda bank kartasymen nemese smartfon arqyly (NFC) tólem jasaý burynǵydaı jalǵasatyn bolady. Saýda oryndary qolma-qol aqshasyz tólemniń barlyq túrin qabyldaýǵa mindetti. Bul týraly Ulttyq bank tóraǵasy Tımýr Súleımenov málim etti.
- Kásipkerlerdiń bank kartasymen tólem qabyldaýdan bas tartýyna esh negiz joq. Sebebi bulaı satyp alýshylardy joǵaltýy múmkin. Sonymen qatar biryńǵaı QR arqyly tólem qabyldaǵany úshin kásipkerler tóleıtin komıssııa qazir bank kartasymen tólem qabyldaý kezinde tólep júrgen komıssııadan joǵary bolmaıdy, -dedi bank tóraǵasy.
Ulttyq banktiń Tólem júıeleri jáne tsıfrlyq qarjy tehnologııalary departamentiniń dırektory Erlan Ashyqbekovtiń sózinshe, zań boıynsha saýda oryndary bank kartasymen, QR-kodpen jáne mobıldi qosymsha arqyly tólem qabyldaý múmkindigin qamtamasyz etýge mindetti.
Sondaı-aq Ulttyq bank ókilderi qolma-qol aqshasyz tólem qabyldaýdan bas tartqan kásipkerlerge ákimshilik jaýapkershilik qarastyrylǵanyn eskertti.
Eske salaıyq, 17 shildede Qazaqstanda bankaralyq QR arqyly tólem jasaý servısi iske qosyldy. Al 19 shildeden bastap biryńǵaı QR júıesine qatysý barlyq ekinshi deńgeıli bank úshin mindetti bolady.
