Biryńǵaı energetıkalyq júıe: jańa jobalardyń júzege asyrylý qarqyny qalaı
ASTANA. KAZINFORM – «KEGOC» AQ Basqarma tóraǵasy Nábı Aıtjanov Biryńǵaı elektr energetıkalyq júıesi aıasynda iske asyrylyp jatqan jobalarǵa túsinik berdi.
- KEGOC aktsıonerlik qoǵamy júıelik operator retinde Qazaqstannyń Biryńǵaı elektr energetıkalyq júıesiniń úzdiksiz jumysyn qamtamasyz etip otyr. Barlyq óndiristik kórsetkishter turaqty ósýdi baıqatty. Búginde 35,4 mlrd teńge kóleminde ınvestıtsııa ıgerildi. Jospar boıynsha 483 nysandy jóndeý jumystary aıaqtalyp, kúzgi-qysqy kezeńdegi jumysqa daıyndyq týraly pasport alyndy. Energetıkalyq qaýipsizdikti qamtamasyz etý maqsatynda KEGOC 2035 jylǵa deıin generatsııa obektilerin engizý josparymen tolyqtaı kelisilgen Ulttyq elektr jelisin damytýdyń strategııalyq baǵdaryn bekitti. Bul strategııaǵa energojúıeniń ótkizý qabiletin ulǵaıtýǵa, sonymen qatar jańartylatyn energııa kózderin ıntegratsııalaýǵa baǵyttalǵan shamamen 10 joba kirdi. Qazirgi ýaqytta kompanııa eki iri ınvestıtsııalyq jobany júzege asyryp jatyr, - dedi N. Aıtjanov Úkimet otyrysynda.
Birinshisi - Qazaqstannyń Ońtústik aımaǵynyń elektr jelisin nyǵaıtýǵa arnalǵan. Bul joba Soltústik-Ońtústik «Almaty – Jambyl» tranzıtiniń ótkizý qabiletin 440 MVt-qa arttyrady. Joba aıasynda uzyndyǵy 475 km bolatyn 500 kV jeli salynady. Qazirgi kezde jospar boıynsha qurylys-montaj jumystary atqarylyp jatyr. Joba 2027 jyldyń ortasynda aıaqtalady.
- Ekinshi joba Batys Qazaqstan elektr jelisin Qazaqstannyń Biryńǵaı energetıkalyq júıesine qosýǵa baǵyttalǵan. Bul joba batys óńirdiń tutynýshylaryn elektr qýatymen jabdyqtaýdyń senimdiligin arttyrady, sonymen qatar Atyraý jáne Aqtóbe oblystaryndaǵy elektr stantsııalarynyń qýatyn ulǵaıtady. Joba aıasynda uzyndyǵy 604 km bolatyn 500 kV jeli salynady. Barlyq jumys kestege sáıkes júrip jatyr, problemalar joq. Joba 2027 jyly aıaqtalady, - dedi kompanııa basshysy.
Atap ótken jobalarǵa qosa, 2035 jylǵa deıingi josparǵa Astana qalasynyń syrtqy elektrmen jelisimen jabdyqtaý qýatyn nyǵaıtý jobasy kirdi. Bul joba qalanyń ósip kele jatqan elektr energııasyna degen qajettigin qamtamasyz etedi. Joba aıasynda 2028 jyly qala syrtynda 500 kV tsıfrlyq qosalqy stantsııasy salynady.
- Taǵy bir iri perspektıvaly jobalardyń biri - Soltústik-Ońtústik turaqty jelisin salý. Bul joba energetıkalyq júıeniń tranzıttik ótkizý qabiletin 2000 MVt-qa arttyrady. Qazirgi ýaqytta jobanyń tehnıkalyq-ekonomıkalyq negizdemesi ázirlenip jatyr. Jobany iske asyrý merzimi - 2029 jyl. Jalpy alǵanda, jospar boıynsha 7000 shaqyrym jańa elektr berý jelimi salynbaq. Bul jobalardy iske asyrý Qazaqstannyń Biryńǵaı energetıkalyq júıesin damytýǵa, senimdi energetıkalyq júıeni qurýǵa jáne elimizdiń mańyzdy energetıkalyq aımaqtaryn baılanystyrýǵa múmkindik beredi, - dedi Nábı Aıtjanov.
Budan buryn habarlanǵandaı, elimizde sheteldik ınvestıtsııa esebinen energııa saqtaıtyn nysandar salynady.