BRIKS damý turǵysynan mol áleýetke ıe — Prezıdent
QAZAN. KAZINFORM — Memleket basshysy «BRIKS plıýs» sammıtine qatysty, dep habarlaıdy Aqorda.
Prezıdent Qasym-Jomart Toqaev Qazan qalasynda ótip jatqan BRIKS-tiń plenarlyq otyrysynyń «BRIKS plıýs»/«aýtrıch» formatynda sóz sóıledi. Memleket basshysy BRIKS ózara tıimdi yntymaqtastyqqa nıetti kóptegen eldiń nazaryn aýdaratyn halyqaralyq aýqymdaǵy jahandyq ortalyqqa aınalyp kele jatqanyn atap ótti.
— BRIKS damý turǵysynan mol áleýetke ıe jáne túrli qurlyqtaǵy memleketterdi biriktiredi. Sondaı-aq yntymaqtastyqty nyǵaıtyp, ortaq resýrstardy barlyq qatysýshynyń ıgiligine tıimdi paıdalanady. Ózara qurmet pen seriktestik, birlese órkendeý qaǵıdattaryna negizdelgen keleshektiń irgesin qalaýǵa BRIKS-tiń tájirıbesi de, múmkindigi de jetedi, — dedi Prezıdent.
Qasym-Jomart Toqaevtyń pikirinshe, BRIKS-tiń kópjaqty kúsh-jigeri álemde áli de balamasy joq ámbebap qurylym sanalatyn BUU qyzmetin tolyqtyra túsedi.
— BUU Jarǵysyndaǵy dıplomatııa men dıalog qaǵıdattary BRIKS-tiń negizgi kún tártibine aınaldy. Ol qaqtyǵystardy beıbit jolmen retteýge jáne strategııalyq turaqtylyqty nyǵaıtýǵa yqpal etip otyr. Biz Eýrazııanyń teń ári birtutas qaýipsizdigin qamtamasyz etýge qatysty Reseıdiń tujyrymdamasyn joǵary baǵalaımyz. Onyń túp negizinde ózara senim men yntymaqtastyqty nyǵaıtý arqyly geosaıası qysymdy tómendetý nıeti jatyr. Qazaqstan Qytaıdyń halyqaralyq turaqtylyqty saqtaý, egemendikti qorǵaý, qaqtyǵystardy beıbit jolmen sheshý jáne kópqyrly tásilderdi qoldaný arqyly jahandyq qaýipsizdikti qamtamasyz etý bastamasyn qoldaıdy. Sondaı-aq elimiz Qytaı men Brazılııanyń Ýkraına jónindegi beıbit josparyn quptaıdy, — dedi Prezıdent.
Eske salsaq, QR Prezıdenti Qasym-Jomart Toqaev Reseı Federatsııasynyń Prezıdenti Vladımır Pýtınniń shaqyrýymen BRIKS-ke múshe memleketter basshylarynyń XVI Sammıtine qatysý úshin Qazan qalasyna jumys saparymen barǵan bolatyn.
Memleket basshysy BRIKS sammıtine qatysýshylarmen birqatar kezdesý ótkizdi.
QR Prezıdenti jáne ózge BRIKS+ sammıtine qatysýshylar birge sýretke tústi.
