Brıfıng: respýblıka boıynsha qylmys sanynyń kóbeıýine qylmystardy esepke alý jáne tirkeý tártibiniń qatańdatylýy áser etti

Bul týraly búgin aptalyq brıfıng barysynda Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.

Qazaqstanda polıtsııa jumysynyń basty qorytyndylary keńes kezeńinen kele jatqan myna eki kórsetkish boıynsha baǵalanady: qylmys deńgeıin tómendetý jáne qylmystardy ashýdy arttyrý.

«Qalaı da joǵary kórsetkishterge qol jetkizýge tyrysý keıde polıtsııa qyzmetkerlerin qylmystardy jáne basqa da zań buzýshylyqtardy jasyrýǵa ıtermeleıdi», deıdi Q. Jumanov.

Til saıasaty jáne aqparat departamentiniń bastyǵy Q. Jumanovtyń atap kórsetkenindeı, soǵan oraı ІІM men Bas prokýratýra polıtsııada qylmystardy jasyrý praktıkasyn joıý jáne qylmystar týraly azamattardyń aryzdary men habarlamalaryn tolyq tirkeýdi qamtamasyz etý boıynsha júıeli jáne qatań jumys júrgizýde.

Sondyqtan qylmystardy esepke alý jáne tirkeý tártibiniń qatańdatylýy respýblıka boıynsha qylmys sanynyń kóbeıýine ákep soqty. Degenmen Qazaqstanda qylmystardy ashý basqa shet memleketterge qaraǵanda áldeqaıda joǵary. Máselen, AQSh-ta damyǵan tehnıkalyq qural-jabdyqtar men polıtseılerge bólinetin qyrýar qarajattarǵa qaramastan, qylmystyń ashylý deńgeıi 25 paıyzdy qurap otyr. Bizdiń elde bul kórsetkish 50-60 paıyz shamasynda.